1.31 கோடி மகளிரின் வங்கிக் கணக்கில் ரூ.5,000: முதல்வா் மு.க.ஸ்டாலின் அதிரடி

தமிழகத்தில் மகளிா் உரிமைத் தொகை பெறும் 1.31 கோடி பேரின் வங்கிக் கணக்கில் தலா ரூ.5,000 வெள்ளிக்கிழமை (பிப். 13) வரவு வைக்கப்பட்டதாக முதல்வா் மு.க.ஸ்டாலின் அறிவித்தாா்.

தமிழகம் முழுவதும் கலைஞா் மகளிா் உரிமைத் தொகைத் திட்டத்தின் கீழ் 1.31 கோடி போ் பயன்பெறுகின்றனா். இவா்களுக்கு மாதந்தோறும் ரூ.1,000 உரிமைத் தொகையாக அவரவா் வங்கிக் கணக்கில் வரவு வைக்கப்படுகிறது. இந்த நிலையில், பயனாளிகள் அனைவரது வங்கிக் கணக்கிலும் தமிழக அரசால் வெள்ளிக்கிழமை ரூ.5,000 வரவு வைக்கப்பட்டது.

வங்கிக் கணக்கில் ரூ.5,000 வரவு வைக்கப்பட்ட தகவலை கைப்பேசிக்கு வந்த குறுஞ்செய்தி மூலம் அறிந்ததும் பயனாளிகள் மத்தியில் பரபரப்பு ஏற்பட்டது. எதிா்க்கட்சிகள் இதை விமா்சிக்கவும் செய்துள்ளன.

மகளிா் வங்கிக் கணக்கில் ரூ.5,000 வரவு வைக்கப்பட்டது குறித்து முதல்வா் ஸ்டாலின் வெள்ளிக்கிழமை வெளியிட்ட காணொலிக் காட்சியில் பேசியிருப்பதாவது: தமிழக அரசு சாா்பில் மகளிா் உரிமைத் தொகை பயனாளிகளின் கணக்குகளில் ரூ.5,000 வரவு வைக்கப்பட்டுள்ளது. திமுக ஆட்சிப் பொறுப்பேற்றபோது கரோனா தொற்று உச்சத்தில் இருந்தது. அதைச் சமாளித்து மக்களின் உயிரைக் காத்தது மட்டுமன்றி, அவா்களின் வாழ்வாதாரத்தைக் காக்க ரூ.4,000 நிவாரணத் தொகை வழங்கப்பட்டது.

நிதி நெருக்கடியைச் சமாளித்து...: கடந்த ஆட்சி விட்டுச் சென்ற கடுமையான நிதி நெருக்கடியைச் சமாளித்து, பல திட்டங்களை நிறைவேற்றினோம். திமுக ஆட்சிக்கு வருவதற்கு முன்பு மாதம் ரூ.1,000 உரிமைத் தொகை வழங்கப்படும் என்று அறிவித்தேன். அப்போது, ‘இது சாத்தியமே இல்லை’ என்று சிலா் சொன்னாா்கள்.

ஆனாலும், நிதி நெருக்கடியைச் சமாளித்து, மத்திய அரசின் ஓரவஞ்சனையையும் மீறி, கடந்த 2023-ஆம் ஆண்டு செப்டம்பா் முதல் மகளிா் உரிமைத் தொகை திட்டம் வெற்றிகரமாகச் செயல்படுத்தப்பட்டு வருகிறது. முதலில், 1.13 கோடி மகளிருக்கு பயனளித்த இந்தத் திட்டம் அண்மையில் விரிவுபடுத்தப்பட்டு, தற்போது 1.31 குடும்பத் தலைவிகள் பயன்பெற்று வருகிறாா்கள்.

இது வெறும் நிதியுதவி அல்ல; சமூகத்தில் பெண்கள் ஆற்றும் பங்களிப்பை அங்கீகரிப்பதற்காகக் கொடுக்கப்படும் உரிமைத் தொகை. இந்தத் தொகையை வைத்து, அன்றாட வீட்டுச் செலவுகள், குடும்பத்தில் ஏற்படும் மருத்துவச் செலவுகள், குழந்தைகளுக்கான கல்விச் செலவுகள் என பல அத்தியாவசியச் செலவுகளை மகளிா் தாங்களே நிறைவு செய்ய இந்த திட்டம் வழிவகுத்தது.

திட்டத்தை நிறுத்த முயற்சி: அதனால்தான், ஒவ்வொரு மாதமும் 15-ஆம் தேதி என்பது ஒவ்வொரு குடும்பத் தலைவியும் ஆவலோடு எதிா்பாா்க்கும் நாளாக அமைந்துள்ளது. இந்தத் திட்டத்தை மற்ற மாநிலங்களும் பின்பற்றி வருகின்றன. இந்த உரிமைத் தொகையை மேம்படுத்த வேண்டும் என நாம் செயல்பட்டு வந்தால், அதற்கு எதிராக தில்லியில் இருக்கும் ஒரு கூட்டமும், தமிழ்நாட்டில் அவா்களுக்கு அடிமையாக இருக்கும் இன்னொரு கூட்டமும், எதிா்வரும் சட்டப்பேரவைத் தோ்தலைக் காரணம் காட்டி, அடுத்த மூன்று மாதங்களுக்கு இந்த மகளிா் உரிமைத் தொகையை நிறுத்த சூழ்ச்சி செய்வதாகத் தகவல் வருகிறது. இதுதொடா்பாக நீதிமன்றத்தில் வழக்குத் தொடுக்கவும் சிலா் முயற்சி செய்வதாக செய்திகள் வருகின்றன.

1.31 கோடி மகளிா் உழைப்பை அங்கீகரிக்கும் இந்தத் திட்டத்தை மூன்று மாதங்கள் நிறுத்திவைத்தால் மகளிா் எவ்வளவு சிரமங்களுக்கு ஆளாவீா்கள் என உங்கள் வீட்டில் ஒருவனாக இருக்கும் எனக்கு நன்றாகத் தெரியும். கடும் வெயிலில் வேலைக்குப் போக கடினமான கோடை காலத்தில், இந்தத் தொகை நிறுத்தப்பட்டால் உங்களுக்கு எவ்வளவு வலி ஏற்படும் என என்னால் உணர முடிகிறது.

முக்கிய முடிவு: உங்கள் மாதாந்திரச் செலவை எப்படி சமாளிப்பீா்கள், உங்கள் குடும்பத்தில் நோய்வாய்ப்பட்டவா்களுக்கு மாத்திரை வாங்கிக் கொடுக்க முடியுமா, குழந்தைகள் தோ்வு எழுதும் காலத்தில் அவா்களுக்கு உணவு கொடுப்பதில் இருந்து தேவையான கல்விச் செலவுகளைச் செய்ய முடியுமா, இந்த கஷ்டத்தை எல்லாம் நினைத்துப் பாா்த்துதான் இந்த முக்கிய முடிவை எடுத்தேன்.

அதன்படி, இந்த பிப்ரவரி மட்டுமல்லாமல் அடுத்த இரு மாதங்கள், அதாவது மாா்ச், ஏப்ரலுக்கான உரிமைத் தொகை தவணைகளையும் சோ்த்து ரூ.3,000 மற்றும் கூடுதலாக கோடைகாலச் செலவுகளைக் கருத்தில்கொண்டு மேலும் ரூ.2,000 சிறப்புத் தொகை என இந்த பிப்ரவரியில் ரூ.5,000-ஐ சிறப்பு மகளிா் உரிமைத் தொகையாக 1.31 கோடி மகளிருக்கு வழங்க உத்தரவிட்டிருக்கிறேன்.

இந்த ரூ.5,000-ஐ அடுத்த மூன்று மாதங்களுக்கு நீங்கள் பயன்படுத்திக் கொள்ள வேண்டும் என்பதால் சிறிது கவனமாகச் செலவிடுங்கள். முடிந்த அளவுக்குச் சேமிக்கவும் பாருங்கள்.

பெட்டிச் செய்தி...

உரிமைத் தொகை

ரூ.2,000-ஆக உயா்த்தப்படும்

‘மகளிா் ஆதரவோடு அடுத்து அமையப் போவதும் திமுக ஆட்சிதான். அடுத்த திமுக 2.0 ஆட்சியில் மகளிா் உரிமைத் தொகை ரூ.2,000-ஆக உயா்த்தி வழங்கப்படும். சொன்னால் சொன்னதைச் செய்யும் முத்துவேல் கருணாநிதி ஸ்டாலின் கொடுக்கும் வாக்குறுதி இது. இதையும் எப்படிச் செய்வோம் என்று சிலா் கேட்கலாம். கடந்த ஆட்சியின் 10 ஆண்டுகளில் தமிழ்நாடு அடைய முடியாத பொருளாதார வளா்ச்சியை திமுக ஆட்சியில் இந்தியாவே திரும்பிப் பாா்க்கும் அளவுக்கு சாதித்துக் காட்டியிருக்கிறோம். அதனால், எந்தத் தடை வந்தாலும் அதையெல்லாம் தாண்டி வெல்வோம்’ என காணொலிக் காட்சியில் முதல்வா் ஸ்டாலின் பேசினாா்.