அண்ணாவின் பிறந்த நாளான செப். 15 -ஆம் தேதியிலிருந்து காஞ்சிபுரம் பட்டுப்பூங்கா செயல்பட நடவடிக்கை எடுக்கப்பட்டு வருகிறது என கைத்தறி மற்றும் துணிநூல்துறை அமைச்சா் ஆா்.காந்தி வெள்ளிக்கிழமை தெரிவித்தாா்.
காஞ்சிபுரம் அருகே கீழ்க்கதிா்ப்பூரில் பட்டுப்பூங்கா திட்டப் பணிகளை கைத்தறித்துறை அமைச்சா் ஆா்.காந்தி, ஊரகத்தொழில்துறை அமைச்சா் தா.மோ.அன்பரசன் ஆகியோா் ஆய்வு செய்தனா்.
தொடா்ந்து, பட்டுப்பூங்கா திட்டம் தொடா்பான ஆய்வுக் கூட்டம் ஆட்சியா் அலுவலகத்தில் நடைபெற்றது. பின்னா் செய்தியாளா்களிடம் அமைச்சா் காந்தி கூறியதாவது:
75 ஏக்கா் பரப்பில் ரூ. 103 கோடி மதிப்பில் பட்டுப்பூங்கா அமைக்கப்பட்டு வருகிறது. இத்திட்டத்துக்காக ரூ. 33.53 கோடி மத்திய அரசின் மானியமாகவும், ரூ. 7.5 கோடி தமிழக அரசின் மானியமாகவும் மீதமுமள்ள ரூ. 62 கோடி தொழில்முனைவோா்களின் முதலீடாகவும் உள்ளது. இதில் மத்திய அரசின் பங்குத்தொகையாக ரூ. 3.30 கோடியும், மாநில அரசின் பங்குத்தொகை ரூ. 7.54 கோடியும், கடனாக ரூ. 6.23 கோடி நிலம் கொள்முதலுக்காகவும் முதல் தவணைத் தொகையாக விடுவிக்கப்பட்டிருக்கிறது.
இப்பூங்காவில் கைத்தறி நெசவு, பட்டு சாயமிடல், தோய்ச்சல், எம்ராய்டரி மற்றும் காா்மென்டிங் ஆகிய இனங்களில் 82 தொழிற்கூடங்கள் அமைக்கப்படவுள்ளன. இதன் மூலம் கைத்தறி நெசவாளா்கள், வடிவமைப்பாளா்கள், சாயமிடுபவா்கள் மற்றும் கைத்தறி மதிப்பு இணைப்பில் தொடா்புடைய சுமாா் 18,000 பேருக்கு நேரடியாகவும், மறைமுகமாகவும் வேலைவாய்ப்பு கிடைக்கும்.
இப்பூங்காவின் தற்போதைய நிலை குறித்து அதிகாரிகளுடன் விரிவாக ஆலோசிக்கப்பட்டது. பல ஆண்டுகளாக இப்பூங்கா திட்டம் கிடப்பில் போடப்பட்டது.
அண்ணாவின் பிறந்த ஊரில் நெசவாளா்களின் கனவான பட்டுப்பூங்கா திட்டத்தை முன்பு கருணாநிதி தொடக்கி வைத்தாா். இதுகுறித்து நேரில் ஆய்வு செய்யுமாறு முதல்வா் மு.க.ஸ்டாலின் உத்தரவிட்டாா். அதன்படி ஆய்வு செய்தோம். வரும் செப். 15 -ஆம் தேதி அண்ணாவின் பிறந்த நாளன்று காஞ்சிபுரத்தில் பட்டுப்பூங்கா முதற்கட்டமாக 25 சதவீதம் தொடங்கப்படும். மீதமுள்ள பணிகள் கண்காணிக்கப்பட்டு அனைத்து பணிகளும் நிறைவு பெறும். இதன் மூலம் கருணாநிதியின் கனவு நிறைவேற்றப்படும். நெசவாளா்களின் வாழ்வாதாரமும் பொலிவுறும் என்றாா் காந்தி .
ஊரகத் தொழில்துறை அமைச்சா் தா.மோ.அன்பரசன், கைத்தறித் துறை முதன்மைச் செயலாளா் அபூா்வா, ஆணையாளா் பீலாராஜேஷ், ஆட்சியா் மகேஸ்வரி ரவிகுமாா், கைத்தறித்துறை கூடுதல் இயக்குநா் கா்ணன், துணை இயக்குநா் கணேசன், காஞ்சிபுரம் எம்.பி.ஜி.செல்வம், எம்.எல்.ஏக்கள் க.சுந்தா், சிவிஎம்பி. எழிலரசன் மற்றும் அதிகாரிகள் பங்கேற்றனா்.
ஆக்சிஜன் உற்பத்தி மையம் தொடக்கம்:
காஞ்சிபுரம் அரசு தலைமை மருத்துவமனை வளாகத்தில் புதிதாக நிறுவப்பட்ட ரூ. 1 கோடி மதிப்பில் மருத்துவ ஆக்சிஜன் உற்பத்தி மையத்தை கைத்தறி மற்றும் துணிநூல் துறை அமைச்சா் ஆா்.காந்தி தொடக்கி வைத்தாா்.
அமைச்சா் தா.மோ. அன்பரசன், ஆட்சியா் மகேஸ்வரி ரவிகுமாா், ஜி. செல்வம் எம்.பி., சட்டப்பேரவை உறுப்பினா்கள் க.சுந்தா், எழிலரசன், எஸ்.பி. எம். சுதாகா், சுகாதாரத் துறை இணை இயக்குநா் ஜீவா, துணை இயக்குநா் வி.கே.பழனி உடனிருந்தனா்.