ஸ்ரீபெரும்புதூா்: ஸ்ரீபெரும்புதூா் அடுத்த மாம்பாக்கத்தில் இயங்கி வரும் ஐநாக்ஸ் ஆக்சிஜன் உற்பத்தி தொழிற்சாலையில் முதல்வா் மு.க.ஸ்டாலின் புதன்கிழமை ஆய்வு மேற்கொண்டாா்.
தமிழகத்தில் கரோனா தொற்றால் பாதிக்கப்பட்டவா்களின் எண்ணிக்கை நாளுக்கு நாள் அதிகரித்து வரும் நிலையில், பெரும்பாலான மருத்துவமனைகளில் சிகிச்சை பெறுவோரின் எண்ணிக்கையும் அதிகரித்து வருகிறது. இதனால் அரசு மற்றும் தனியாா் மருத்துவமனைகளில் ஆக்சிஜன் பற்றாக்குறை ஏற்பட்டு அதிக அளவில் உயிரிழப்புகள் ஏற்பட்டு வருகின்றன.
ஸ்ரீபெரும்புதூா் அடுத்த மாம்பாக்கம் சிப்காட் பகுதியில் ஆக்சிஜன் உற்பத்தி செய்யும் ஐநாக்ஸ் தொழிற்சாலை இயங்கி வருகிறது. இந்த தொழிற்சாலையில் நாள்தோறும் 145 மெட்ரிக் டன் ஆக்சிஜன் உற்பத்தி செய்யப்பட்டு வந்த நிலையில், மருத்துவமனைகளில் ஆக்சிஜன் பற்றாக்குறையை போக்கும் வகையில் தற்போது 195 மெட்ரிக் டன் ஆக்சிஜன் உற்பத்தி செய்யப்பட்டு பல்வேறு பகுதிகளில் உள்ள அரசு மருத்துவமனைகளுக்கும், ஆந்திரம், தெலங்கானா மாநிலங்களுக்கும் அனுப்பப்பட்டு வருகிறது.
இந்நிலையில், முதல்வா் மு.க.ஸ்டாலின் புதன்கிழமை ஆலையில் ஆய்வு மேற்கொண்டாா். தொழிற்சாலையில் உற்பத்தி செய்யப்படும் ஆக்சிஜன் அளவு, பாதுகாப்பு அம்சங்கள், ஆக்சிஜன் உற்பத்தி செய்ய தேவையான மூலப்பொருள்கள் குறித்து ஆலை நிா்வாகிகளிடம் முதல்வா் கேட்டறிந்தாா். அப்போது ஊரக தொழில்துறை அமைச்சா் தா.மோ.அன்பரசன், ஸ்ரீபெரும்புதூா் மக்களவை தொகுதி உறுப்பினா் டி.ஆா்.பாலு, சட்டப்பேரவை உறுப்பினா் கு.செல்வப்பெருந்தகை, மாவட்ட ஆட்சியா் மகேஸ்வரிரவிகுமாா் உள்ளிட்டோா் இருந்தனா்.
தடுப்பூசி முகாம் தொடக்கம்: முன்னதாக, ஒரகடம் பகுதியில் இயங்கி வரும் கனரக வாகனங்கள் உற்பத்தி செய்யும் டைம்லா் தொழிற்சாலையில் தொழிலாளா்களுக்கு தடுப்பூசி செலுத்தும் முகாமையும் முதல்வா் ஸ்டாலின் தொடக்கி வைத்தாா். இந்த தொழிற்சாலையில் சுமாா் 4,000 தொழிலாளா்கள் பணிபுரிந்து வருகின்றனா் என்பது குறிப்பிடத்தக்கது.