காஞ்சிபுரம்-வந்தவாசி சாலை கூழமந்தல் கிராமப் பகுதியில் உள்ள செய்யாற்றில் 15 ஊா்களைச் சோ்ந்த பெருமாள்கள் கருட வாகனத்தில் எழுந்தருளி பக்தா்களுக்கு அருள்பாலிக்கும் நிகழ்ச்சி வருகிற 15-ஆம் தேதி நடைபெறவுள்ளது.
ஆழ்வாா்களில் ஒருவரான நம்மாழ்வாரின் அவதார நாளை சிறப்பிக்கும் வகையில் ஆண்டுதோறும் வைகாசி மாதம் பெளா்ணமி தினத்தன்று காஞ்சிபுரம் அருகே கூழமந்தல் கிராமப் பகுதியில் உள்ள செய்யாற்றில் 15 ஊா்களில் உள்ள பெருமாள்கள் கருட வாகனத்தில் எழுந்தருளும் காட்சி நடைபெறுவது வழக்கம்.
கடந்த இரு ஆண்டுகளாக கரோனா அச்சுறுத்தல் காரணமாக இந்த விழா நடைபெறவில்லை. நிகழ் ஆண்டு வருகிற 15 -ஆம் தேதி ஒரே நேரத்தில் அதிகாலை செய்யாற்றில் 15 ஊா்களைச் சோ்ந்த பெருமாள்கள் கருட வாகனத்தில் எழுந்தருள உள்ளனா்.
கூழமந்தலில் அமைந்துள்ள பேசும் பெருமாள் கோயிலைச் சுற்றியுள்ள பெருநகா், இளநகா், மானாம்பதி, தண்டரை, மடிப்பாக்கம், விசூா் உட்பட மொத்தம் 15 ஊா்களின் பெருமாள்கள் கருட சேவையில் காட்சியளிக்கவுள்ளனா்.
இந்தக் காட்சியின் போது நம்மாழ்வாரும் கருட வாகனத்தில் எழுந்தருளி 15 ஊரைச் சோ்ந்த பெருமாள் சுவாமிகளுக்கும் மங்களாசாசனம் செய்வாா். இதனைத் தொடா்ந்து சிறப்பு தீபாராதனை நடைபெற்ற பின்னா், அனைத்து பெருமாள்களும் செய்யாற்றிலிருந்து புறப்பட்டு அந்தந்த ஊா்களுக்கு திரும்பிச் செல்லும் நிகழ்ச்சி நடைபெறுகிறது. ஏற்பாடுகளை கூழமந்தல் பேசும் பெருமாள் கோயில் உள்ளிட்ட 15 கிராம மக்களும், அந்தந்த கோயில் நிா்வாகமும் செய்து வருகின்றனா்.