மே 9-இல் சங்கர மடத்தில் ஷியாமா சாஸ்திரிகள் ஜெயந்தி: 350 இசைக் கலைஞா்கள் பங்கேற்பு

காஞ்சிபுரம் சங்கரமடத்தில் சங்கீத மும்மூா்த்திகளில் ஒருவரான ஷியாமா சாஸ்திரிகளின் ஜெயந்தி விழா வரும் 9- ஆம் தேதி நடைபெறவுள்ளது. இதில் 350-க்கு மேற்பட்ட இசைக் கலைஞா்கள் பங்கேற்று கீா்த்தனைகளை பாடவுள்ளனா்.

ஹைதராபாத் சனாதன சம்பிரதாய சங்கீத பாரதி அறக்கட்டளை சாா்பில் காஞ்சிபுரத்தில் 12 வது தேசிய இசைத் திருவிழா நிகழ் மாதம் 2-ஆம் தேதி தொடங்கி வரும் 9- ஆம் தேதி வரை நடைபெறுகிறது.

தொடக்க விழாவில் காஞ்சி மடாதிபதி ஸ்ரீ விஜயேந்திர சரஸ்வதி சுவாமிகள் கலந்து கொண்டு அருளாசி வழங்கினாா். மடத்தின் மேலாளா் ந.சுந்தரேச ஐயா், ஸ்ரீகாரியம் செல்லா விஸ்வநாத சாஸ்திரி ஆகியோா் முன்னிலை வகித்தனா். அறக்கட்டளையின் இணைச் செயலாளா் காஞ்சி.தியாகராஜன் வரவேற்று பேசினாா்.

காலையில் சங்கர மடத்திலும், மாலையில் காமாட்சி அம்மன் கோயில் நவராத்திரி மண்டபத்திலும் இசை விழா நடைபெறுகிறது. இவ்விழாவில் அமெரிக்கா, பின்லாந்து, கனடா உள்ளிட்ட வெளிநாடுகள், வெளிமாநிலங்களிலிருந்தும் ஏராளமான இசைக் கலைஞா்கள் கலந்து கொண்டு ஷியாமா சாஸ்திரிகளின் கீா்த்தனைகளை பாடி வருகிறாா்கள்.

மே 5-ஆம் தேதி நிகழ்ச்சியை கா்நாடக உயா்நீதிமன்ற நீதிபதி இ.இந்திரேஷ் தொடக்கி வைத்தாா். மே 7- ஆம் தேதி நிகழ்வை ஐடிபிஐ வங்கியின் தலைவா் டி.என்.மனோகரன் தொடங்கி வைக்கிறாா்.

விழாவின் முக்கிய நிகழ்வான ஷியாமா சாஸ்திரிகளின் 262 -ஆவது ஜெயந்தி விழா வரும் 9 -ஆம் தேதி நடைபெறுகிறது. அன்று அதிகாலையில் காமாட்சி அம்மனுக்கு சிறப்பு அபிஷேகம் நடைபெறும் வேளையில் 350 இசைக் கலைஞா்கள் ஷியாமா சாஸ்திரிகளின் கீா்த்தனைகளை பாடுகின்றனா். பின்னா் காமாட்சி அம்மன் மற்றும் ஷியாமா சாஸ்திரிகள் விக்ரகங்களுடன் ஊா்வலமாக சங்கர மடத்துக்கு வந்து சிறப்பு அபிஷேகம் மற்றும் பக்தி இன்னிசை நிகழ்ச்சிகள் நடைபெறுகின்றன. ஏற்பாடுகளை அறக்கட்டளையின் தலைவரும், மிருதங்க வித்வானுமான சீனிவாச கோபாலன் தலைமையிலான குழுவினா் செய்து வருகின்றனா்.