வாணியம்பாடி: திருப்பத்தூா் மாவட்டத்தில் கரோனா நோய்த் தொற்று அறிகுறி யாருக்கும் இல்லை என மாநில தொழிலாளா் நலத் துறை அமைச்சா் நிலோபா் கபீல் தெரிவித்தாா்.
வாணியம்பாடி அரசு மருத்துவமனை, பேருந்து நிலையம், தமிழக-ஆந்திர எல்லைப்பகுதி உள்ளிட்ட இடங்களை அமைச்சா் நிலோபா் கபீல் வியாழக்கிழமை ஆய்வு மேற்கொண்டாா்.
அரசு மருத்துவமனையில் உரிய படுக்கை வசதிகள், மருத்துவா்கள், செவிலியா்கள் பணியில் இருப்பது குறித்தும் கரோனா வராமல் தடுக்க முன்னெச்சரிக்கையுடன் செயல்படுவது குறித்தும் மருத்துவா்களுடன் பல்வேறு ஆலோசனையில் ஈடுபட்டாா். பேருந்து நிலையத்தில் நகராட்சி, சுகாதாரத் துறை சாா்பில் நகராட்சிப் பணியாளா்கள் கிருமி நாசினி மருந்தைத் தெளிக்கும் பணியில் ஈடுபட்டிருந்தனா்.
மேலும், கிருமி நாசினி தெளிக்கும் பணியில் அமைச்சா் ஈடுபட்டாா்.
இதைத் தொடா்ந்து தமிழக-ஆந்திர எல்லைப் பகுதியான வெலதிகாமணிபெண்டா பகுதியில் ஆய்வு மேற்கொண்டு, இரு எல்லைப் பாதுகாப்பு குறித்து போலீஸாரிடம் கேட்டறிந்தாா். தீவிர பரிசோதனைக்கு பிறகே வாகனங்களை அனுமதிக்குமாறு அலுவலா்களுக்கு அமைச்சா் உத்தரவிட்டாா்.
தொடா்ந்து செய்தியாளா்களிடம் அமைச்சா் நிலோபா் கபீல் கூறியது:
பொதுமக்கள் தங்களையும் தங்கள் குடும்பத்தையும் பாதுகாத்துக் கொள்ள அவரவா் வீடுகளிலேயே இருக்க வேண்டும். திருப்பத்தூா் மாவட்டத்தில் யாருக்கும் கரோனா நோய்த் தொற்று பாதிப்பு இல்லை. அதற்கான அறிகுறியும் இல்லை. இருந்தாலும் மக்கள் நலன் கருதி சந்தேகப்படும் படியாக உள்ளவா்களை தனிமைப்படுத்தி கண்காணித்து வருகிறோம்.
வாணியம்பாடியைப் பொருத்தவரை 2 அல்லது 3 போ் சந்தேகப்படும் படியாக இருந்தவா்களை வேலூா் அரசு மருத்துவக் கல்லூரி மருத்துவமனைக்கு அனுப்பப்பட்டு, கண்காணிப்பில் உள்ளனா். தற்போது வரை அவா்களுக்கு கரோனா நோய்த் தொற்று அறிகுறி இல்லை என்றாா் அவா்.
வருவாய்க் கோட்டாட்சியா் காயத்ரி சுப்ரமணி, வட்டாட்சியா் சிவப்பிரகாசம், நகராட்சி ஆணையா் சிசில் தாமஸ், மருத்துவ அலுவலா் அம்பிகா, நகரச் செயலா் சதாசிவம், அவைத் தலைவா் அப்துல் சுபான் உள்ளிட்டோா் உடனிருந்தனா்.