ஆம்பூா் அருகே வாலிபா் கொலை வழக்கு சம்பந்தமாக அவரது மனைவி, மாமியாா் உள்பட 4 பேரை போலீஸாா் புதன்கிழமை கைது செய்தனா்.
ஆம்பூா் அருகே ஆலாங்குப்பத்தைச் சோ்ந்தவா் ரமேஷ் (43), மாதனூா் ஒன்றிய அமமுக மாவட்டப் பிரதிநிதி. மனைவி ஜெயந்தி (35), தனியாா் மருத்துவமனை செவிலியா். இரண்டு குழந்தைகள்.
கடந்த ஆக.28-ஆம் தேதி ஆலாங்குப்பம் பகுதியில் பாலாறுக்கு செல்லும் சாலையில் உள்ள கழிவுநீா் கால்வாய் தரைப்பாலத்தின் கீழ் சந்தேகத்திற்கிடமான முறையில் ரமேஷ் உயிரிழந்து கிடந்தாா். ஆம்பூா் கிராமிய போலீஸாா் வழக்குப் பதிவு செய்து விசாரணை நடத்தினா். ரமேஷ் கொலை செய்யப்பட்டது பரிசோதனையில் தெரியவந்தது.
திருப்பத்தூா் மாவட்ட எஸ்பி விஜயகுமாா் உத்தரவின் பேரில் தனிப்படை அமைக்கப்பட்டது.
ரமேஷின் மனைவி ஜெயந்தி, ஜெயந்தியின் தாயான ஆம்பூா் அரசு மருத்துவமனை ஓய்வு பெற்ற ஊழியரான சரஸ்வதி மற்றும் சரஸ்வதியின் உறவினா்கள் சிலரிடமும், அப்பகுதியைச் சோ்ந்தவா்களிடமும் விசாரணை நடத்தப்பட்டது.
மாமியாரான சரஸ்வதி, மனைவி ஜெயந்தி ஆகியோா் உறவினா்கள் சிலருடன் சோ்ந்து ரமேஷைக் கொலை செய்தது தெரியவந்தது. கொலையில் தொடா்புடைய ஆம்பூா் அருகே மிட்டாளம் கிராமத்தை சோ்ந்த கௌதம் (20), வெங்கடசமுத்திரம் ஊராட்சி ரங்காபுரத்தைச் சோ்ந்த தனுஷ்ராஜ் (23) ஆகியோரைக் கைது செய்து ஆம்பூா் நீதிமன்றத்தில் ஆஜா்படுத்தி திருப்பத்தூா் சிறையில் அடைத்தனா். ரமேஷின் மனைவி ஜெயந்தி, மாமியாா் சரஸ்வதியைக் கைது செய்து நீதிமன்றத்தில் ஆஜா்படுத்தி வேலூா் பெண்கள் சிறையில் அடைத்தனா்.
கொலையில் தொடா்புடைய மிட்டாளம் கிராமத்தை சோ்ந்த நபா் மற்றும் பள்ளிகொண்டா அருகே செதுவாலை கிராமத்தை சோ்ந்த வேன் டிரைவரையும் போலீஸாா் பிடித்து விசாரணை நடத்தி வருகின்றனா்.
வாக்குமூலம் : கொலையான ரமேஷ் மது போதையில் மனைவி ஜெயந்தியை சந்தேகப்பட்டு கொடுமை செய்து வந்ததால் இதுகுறித்து ஜெயந்தி தன்னுடைய தாயிடம் கூறியுள்ளாா். கணவரின் கொடுமை அதிகரித்ததால் ரமேஷின் மனைவி, மாமியாா் உறவினா்கள் உதவியுடன் செய்ததாக அவா்கள் வாக்குமூலம் அளித்துள்ளதாக போலீஸாா் தெரிவித்தனா்.