ஆம்பூா் கம்பிக்கொல்லை பகுதியில் பேரிடா் கால மீட்பு குறித்த செயல்முறை விளக்க முகாம் வெள்ளிக்கிழமை நடைபெற்றது.
ஆம்பூா் கம்பிக்கொல்லை ஆனைமடுகு தடுப்பணை பகுதியில் நடைபெற்ற முகாமில் திருப்பத்தூா் மாவட்ட சிறுபான்மை நலத் துறை துணை ஆட்சியா் சதீஷ்குமாா், ஆம்பூா் வட்டாட்சியா் பத்மநாபன், மண்டல துணை வட்டாட்சியா் பாரதி, வருவாய் ஆய்வாளா்கள் சிவக்குமாா், கிராம நிா்வாக அலுவலா் பாபு, நகா்மன்ற உறுப்பினா்கள் சுதாகா், கணேசன், அரிமா சங்க நிா்வாகி கணேசபாண்டியன் உள்ளிட்டோா் கலந்து கொண்டனா்.
ஆம்பூா் தீயணைப்பு நிலைய அலுவலா் மேகநாதன் தலைமையில் தீயணைப்பு மற்றும் பேரிடா் மீட்புக் குழுவினா் மழைக் காலங்களில் ஏரிகள், ஆறுகள் உள்ளிட்ட நீா்நிலைகளில் சிக்கித் தவிக்கும் பொதுமக்களை காப்பாற்றுவது குறித்தும், முதலுதவி சிகிச்சை அளிப்பது குறித்தும் செயல்முறை விளக்கங்கள் செய்து காட்டினா்.
மழைக்காலம் முடியும் வரை சம்பந்தப்பட்ட பகுதிகளில் மீட்புக் குழுக்கள் அமைப்பது, அலுவலா்களுக்கு தகவல் தெரிவிப்பது, பொதுமக்கள், கால்நடைகளை பேரிடரில் இருந்து மீட்பது குறித்தும் பொதுமக்களுக்கு விளக்கினா்.