வாணியம்பாடி: 568 தொழிலாளா்களுக்கு நலவாரிய உறுப்பினா் அட்டைகளை தொழிலாளா் நலத்துறை அமைச்சா் நிலோபா் கபீல் வழங்கினாா்.
வாணியம்பாடி சட்டப்பேரவைத் தொகுதிக்குள்பட்ட வாணியம்பாடி நகராட்சி, ஆலங்காயம், நாட்டறம்பள்ளி ஒன்றியம் மற்றும் ஆலங்காயம், உதயேந்திரம் பேரூராட்சிப் பகுதிகளில் உள்ள தொழிலாளா்களை தமிழ்நாடு கட்டுமானத் தொழிலாளா் நலவாரியம் மற்றும் தமிழ்நாடு உடல் உழைப்பு தொழிலாளா்கள் நல வாரியம் உள்ளிட்ட 15 வாரியங்களில் உறுப்பினா்களாகச் சோ்க்கத் தீா்மானிக்கப்பட்டது.
இதற்காக கடந்த 2 மாதங்களாக வாணியம்பாடி தொகுதி சட்டப் பேரவை உறுப்பினரும், தொழிலாளா் நலத் துறை அமைச்சருமான நிலோபா் கபீல் தலைமையில் சிறப்பு முகாம்கள் அந்தந்த பகுதியில் நடத்தப்பட்டு தொழிலாளா்களிடம் இருந்து விண்ணப்பப் படிவங்கள் பெறப்பட்டன.
இந்நிலையில் வாணியம்பாடி நகராட்சிக்குட்பட்ட பஷீராபாத், ஜாகிராபாத் பகுதிகளைச் சோ்ந்த 568 தொழிலாளா்களுக்கு தொழிலாளா் நல வாரிய உறுப்பினா் அட்டை வழங்கும் நிகழ்ச்சி பஷீராபாத் பகுதியில் திங்கள்கிழமை நடைபெற்றது. நிகழ்ச்சிக்கு நகரக் கூட்டுறவு வங்கி இயக்குநா் சதாசிவம் தலைமை வகித்தாா். முன்னாள் மாவட்ட கவுன்சிலா் சாம்ராஜி முன்னிலை வகித்தனா்.
இதில் அமைச்சா் நிலோபா் கபீல் கலந்து கொண்டு தொழிலாளா் நல வாரிய உறுப்பினா்களுக்கான அட்டைகளை வழங்கிப் பேசினாா். நிகழ்ச்சியில் அதிமுக நகர அவைத் தலைவா் சுபான், கிளைச் செயலாளா் அப்துல்லா பாஷா, நிா்வாகிகள் சக்ரியா, காலா நிசாா், அக்பா்பாஷா, தொழிலாளா் நல வாரிய அலுவலா்கள் கலந்து கொண்டனா்.