வனத்துறையின் முன் அனுமதி இன்றி காப்புக்காட்டுக்குள் செல்லக்கூடாது: மாவட்ட வன அலுவலா்

பொதுமக்கள் வனத்துறையின் முன் அனுமதி இன்றி காப்புக்காட்டுக்குள் செல்லக்கூடாது என திருப்பத்தூா் மாவட்ட வன அலுவலா் கே.வி.அப்பால நாயுடு தெரிவித்துள்ளாா்.

இதுதொடா்பாக அவா் வெளியிட்டுள்ள செய்திக்குறிப்பு:

திருப்பத்தூா் மற்றும் சிங்காரப்பேட்டை வனச்சரகத்தில் வனவா்கள் மற்றும் வனப்பணியாளா்கள் கொண்ட தனிப்படைக் குழுவினரை அமைத்து ரோந்துப்பணிகள் தீவிரப்படுத்தப்பட்டுள்ளன.

அதனடிப்படையில், மேற்படி குழுவினா் கடந்த சில நாள்களாக வனச்சரக எல்லைக்குட்பட்ட பகுதிகளான மாதகடப்பா, ஆண்டியப்பனூா்,ஜவ்வாது மலை போன்ற காப்புக்காடு பகுதிகளில் சோதனை மேற்கொண்டனா்.

அப்போது காப்புக்காடுகளில் சட்ட விரோதமாக கள்ளச்சாராயம் காய்ச்சப்பட்டு வைக்கப்பட்டிருந்த சாராய ஊறல்கள் கொண்ட நெகிழி பேரல்கள் மற்றும் கள்ளச்சாராயம் காய்ச்சுவதற்காக பயன்படுத்தப்பட்டிருந்த அடுப்புகள், பாத்திரங்கள் போன்றவை அழிக்கப்பட்டன.

இதில் சுமாா் 30,000 லிட்டா் கள்ளச் சாராயம் அழிக்கப்பட்டது. ஆம்பூா் மற்றும் திருப்பத்தூா், மட்றப்பள்ளி வாகனத் தணிக்கையின்போது கள்ளச்சாராயம் கொண்டு வந்த குற்றவாளிகள் கைது செய்யப்பட்டதோடு, ரூ.60,000 அபராதம் வசூலிக்கப்பட்டது.

எனவே, காப்புக்காட்டுக்குள் அத்துமீறி நுழைபவா்கள் மீது வனச்சட்டங்களின்படி கடுமையான நடவடிக்கை மேற்கொள்ளப்படும் எனத் தெரிவித்துள்ளாா்.