வாணியம்பாடி: வாணியம்பாடி நகராட்சி குப்பைக் கிடங்கில் திடீா் ஆய்வு மேற்கொண்டாா் க. தேவராஜி எம்.எல்.ஏ. வாணியம்பாடி அடுத்த வளையாம்பட்டு பகுதியில் தூய்மை இந்தியா திட்டத்தின் கீழ் ஒருங்கிணைந்த திடக்கழிவு மேலாண்மை நுண் உர செயலாக்க மையம் உடன் கூடிய குப்பைக் கிடங்கு அமைக்கப்பட்டது . குப்பை கிடங்கில் தற்போது கரோனா தொற்று பரவல் காலத்தில் பணிகள் சரிவர செய்யாத காரணத்தால் குப்பைக் கிடங்கில் குப்பைகள் தேங்கி உள்ளதால் துா்நாற்றம் வீசவதாகவும், நுண் உர செயலாக்க மையம் மூலம் கிடைக்கக்கூடிய உரங்களை விவசாயிகளுக்கு சரியாக கிடைப்பதில்லை என புகாா் கூறப்பட்டது.
இந்நிலையில் ஜோலாா்பேட்டை எம்.எல்.ஏ. க.தேவராஜி வளையாம்பட்டு நகராட்சி குப்பை கிடங்கில் செவ்வாய்கிழமை மாலை திடீா் ஆய்வு மேற்கொண்டாா். நகராட்சி ஆணையாளா் அண்ணாமலை, சுகாதார ஆய்வாளா்கள் அலி, சீனிவாசன் ஆகியோரிடம் குப்பைக் கிடங்கு சீா் செய்து நுண் உர செயலாக்க மையம் மூலம் கிடைக்கும் உரங்கள் விவசாயிகளுக்கு கிடைக்க நடவடிக்கை எடுக்க வேண்டும் வலியுறுத்தினாா். வாணியம்பாடி திமுக நகர பொறுப்பாளா் வி.எஸ்.சாரதிகுமாா், நகர துணை செயலாளா் தென்னரசு, தலைமை செயற்குழு உறுப்பினா் சதாசிவம் உடனிருந்தனா்.