திருத்தணி: போக்குவரத்து காவல் துறை சாா்பில், தண்ணீா் பந்தலை காவல் ஆய்வாளா்கள் ஏழுமலை, அண்ணாதுரை ஆகியோா் திறந்துவைத்து பொது மக்களுக்கு மோா், பழங்களை வியாழக்கிழமை வழங்கினா்.
திருத்தணி நகரில் போக்குவரத்து போலீஸாா் சாா்பில், பொது மக்களுக்கு பயன்படும் வகையில் தண்ணீா் பந்தல் அமைக்குமாறு மாவட்டக் காவல் கண்காணிப்பாளா் வருண்குமாா் உத்தரவிட்டாா். அதைத்தொடா்ந்து, ஏ.எஸ்.பி. சாய்பிரணித் அறிவுறுத்தலின் பேரில், திருத்தணி சுந்தர விநாயகா் கோயில் அருகே திருத்தணி போக்குவரத்து காவல்துறை சாா்பில் தண்ணீா் பந்தல் அமைத்துள்ளது.
இந்த தண்ணீா் பந்தல் திறப்பு நிகழ்ச்சிக்கு, போக்குவரத்து காவல் ஆய்வாளா் ஜெயக்குமாா் தலைமை வகித்தாா். போக்குவரத்து காவல் உதவி ஆய்வாளா்கள் நாகராஜ், அரிகிருஷ்ணன் ஆகியோா் முன்னிலை வகித்தனா்.
சிறப்பு அழைப்பாளராக திருத்தணி காவல் ஆய்வாளா் ஏழுமலை, திருவாலங்காடு காவல் ஆய்வாளா் அண்ணாதுரை ஆகியோா் கலந்துகொண்டு, தண்ணீா் பந்தலை திறந்து வைத்து, பொதுமக்களுக்கு நீா், மோா் மற்றும் தா்பூசணி பழங்களை வழங்கினா்.
நிகழ்ச்சியில், போக்குவரத்து காவலா்களுக்கு கோடை வெயிலில் தங்களை காத்துக் கொள்ள சோலாா் கேப் வழங்கப்பட்டது.
இந்த தண்ணீா் பந்தலில் தினமும் காலை 11 மணிக்கு போக்குவரத்து காவலா்களுக்கு மோா், எலுமிச்சை, தா்பூசணி ஆகியவை வழங்கப்படும் என போக்குவரத்து காவல் ஆய்வாளா் ஜெயக்குமாா் தெரிவித்தாா்.