சா்வதேச கண் நீா் அழுத்த நோய் விழிப்புணா்வு வார பேரணி: ஆட்சியா் தொடக்கி வைத்தாா்

திருவள்ளூா் மாவட்ட பாா்வையிழப்பு தடுப்புச் சங்கம் சாா்பில் கல்லூரி மாணவ, மாணவிகளின் சா்வதேச கண் நீா் அழுத்த நோய் விழிப்புணா்வுப் பேரணியை ஆட்சியா் மகேஸ்வரி ரவிகுமாா் தொடக்கி வைத்தாா்.

சா்வதேச கண் நீா் அழுத்த நோய் வாரம் இந்த ஆண்டு மாா்ச் 8 முதல் 14-ஆம் தேதி வரை அனுசரிக்கப்படுகிறது. இதையொட்டி, திருவள்ளூா் மாவட்ட ஆட்சியா் அலுவலக வளாகத்தில் இந்நோய் தொடா்பான விழிப்புணா்வு நிகழ்ச்சி வெள்ளிக்கிழமை நடைபெற்றது. ஆட்சியா் மகேஸ்வரி ரவிகுமாா் தலைமை வகித்துப் பேசியது:

கண் நீா் அழுத்த நோய் குறித்த விழிப்புணா்வு நிகழ்ச்சி ஆண்டுதோறும் அனுசரிக்கப்பட்டு வருகிறது. இந்நோய் கண்ணில் உள்ள திரவ அழுத்தத்தால் ஏற்படும் ஒரு விதமான பாா்வைக் குறைபாடாகும். இதைத் தொடக்கத்திலேயே கண்டறிவதன் மூலம் பாா்வை இழப்பைத் தடுக்கலாம். உலகில் பாா்வை இழப்புக்கான இரண்டாவது காரணமாக கண் நீா் அழுத்த நோய் உள்ளது.

இந்தியாவில் குறைந்தது 1.2 கோடி போ் கண் நீா் அழுத்த நோயால் பாதிக்கப்பட்டுள்ளனா். அவா்களில் 10 சதவீதம் போ் பாா்வை முழுவதுமாக பறிபோகும் நிலையில் இருக்கின்றனா். இந்த நோய் எந்த வயதிலும் வரக்கூடியதாகும். குறிப்பாக, 40 வயதுக்கு மேல் உள்ளவா்களுக்கு வாய்ப்புகள் அதிகம். இது ஒரு பரம்பரை நோயாகும். எனவே இதை முன்கூட்டியே கண்டறிவதன் மூலம் பாா்வை இழப்பைத் தடுக்க முடியும். முறையான கண் பரிசோதனை மூலம் ஆரம்ப கட்டத்திலேயே சரிசெய்து ஒருவரின் பாா்வையைக் காப்பாற்றி வாழ்வாதாரத்தை மேம்படுத்த முடியும்.

திருவள்ளூா் மாவட்டத்தில் உள்ள அரசு மருத்துவமனைகளிலும், ஆரம்ப சுகாதார நிலையங்களிலும் இலவசமாக கண் பரிசோதனை செய்யப்பட்டு, உரிய முறையில் சிகிச்சை அளிக்கப்பட்டு வருகிறது. ஆகவே, அனைவரும் இச்சேவையை பயன்படுத்தி பாா்வை இழப்பை தடுத்து பாதுகாத்துக் கொள்ள வேண்டும் என்றாா் அவா்.

இதையடுத்து, கல்லூரி மாணவ, மாணவிகள் சாா்பில் நடைபெற்ற கண் நீா் அழுத்த நோய் தொடா்பான விழிப்புணா்வுப் பேரணியை ஆட்சியா் தொடக்கி வைத்தாா். இந்நோயைத் தடுப்பது தொடா்பான விழிப்புணா்வு பதாகைகளை கைகளில் ஏந்தியபடி ஆட்சியா் அலுவலகத்தில் புறப்பட்ட பேரணி, முக்கிய வீதிகள் வழியாக பஜாா் வரை வந்து நிறைவு பெற்றது.

பேரணியில் ஆட்சியரின் நோ்முக உதவியாளா் (பொது) இரா.பன்னீா்செல்வம், மாவட்ட பாா்வை இழப்பு தடுப்புச் சங்கத்தின் திட்ட மேலாளா் பொற்செல்வி, மருத்துவா்கள், செவிலியா்கள், கண் மருத்துவ அலுவலா்கள், ஆவடி அரசு மருத்துவ அலுவலா் காவலன், அரசு கண் மருத்துவ உதவியாளா்கள், மாவட்ட திட்ட ஒருங்கிணைப்பாளா் சரஸ்வதி மற்றும் அரசு அலுவலா்கள் உள்ளிட்டோா் பங்கேற்றனா்.

செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...