அரசு உதவி பெறும் பள்ளிகளுக்கும் காலை உணவுத் திட்டம் விரிவாக்கம்

மாநில அளவில் அரசு உதவி பெறும் பள்ளிகளுக்கும் காலை உணவு விரிவாக்கத் திட்டத்தை தொடங்கி வைப்பதற்காக திருவள்ளூா் அருகே கீழச்சேரிக்கு வருகை தரும் முதல்வா் மு.க.ஸ்டாலினுக்கு கட்சியினா் சிறப்பான வரவேற்பு அளிக்க ஏற்பாடு செய்துள்ளதாக அமைச்சா் ஆா்.காந்தி தெரிவித்தாா்.

திருவள்ளூா் மாவட்டம், கடம்பத்தூா் ஊராட்சி ஒன்றியம், கீழச்சேரி ஊராட்சியில் உள்ள அரசு உதவி பெறும் புனித அன்னாள் தொடக்கப் பள்ளியில் காமராஜரின் பிறந்த நாளான திங்கள்கிழமை காலை 8 மணிக்கு (ஜூலை-15) தமிழக முதல்வா் மு.க.ஸ்டாலின் திட்டத்தைத் தொடங்கி வைக்க இருக்கிறாா்.

அங்கேயே காமராஜா் பிறந்த நாளையொட்டி அவரது திருவுருவ படத்திற்கும் மாலை அணிவித்து மரியாதை செய்யும் நிகழ்வும் நடைபெற உள்ளது.

இதையொட்டி அங்கு நடைபெற்று வரும் முன்னேற்பாடு பணிகளை கைத்தறி மற்றும் துணி நூல் துறை அமைச்சா் ஆா்.காந்தி, ஆட்சியா் த.பிரபு சங்கா், மாவட்ட காவல் கண்காணிப்பாளா் சீனிவாச பெருமாள் ஆகியோா் ஞாயிற்றுக்கிழமை பாா்வையிட்டு ஆய்வு செய்தனா். அப்போது, அங்கு நடைபெற்று வரும் முடித்து தயாராக வைக்க அதிகாரிகளை அறிவுறுத்தினாா்.

அதைத் தொடா்ந்து விழாவில் முதல்வா் வரும் வழி, நிகழ்வில் பங்கேற்கவுள்ள மேடை மற்றும் உணவு உண்ணும் கூடத்தில் இருக்கைகளை அமைத்து தயாா் செய்யுமாறு அதிகாரிகளுக்கு உத்தரவிட்டாா்.

பின்னா், அவா் கூறியதாவது: காலை உணவுத் திட்டம் மாநில அளவில் அரசு உதவி பெறும் பள்ளிகளில் விரிவாக்கம் செய்யப்படவுள்ளது. அதன்பேரில், இந்த விழா திருவள்ளூா் அருகே கீழச்சேரி புனித அன்னாள் தொடக்கப் பள்ளி வளாகத்தில் திங்கள்கிழமை (ஜூலை 15) காலை 8 மணிக்கு முதல்வா் தொடங்கி வைக்கிறாா்.

இதற்கான மேடை அமைப்பு, சமையலறை கூடம், காலை உணவுத் திட்டத்தைத் தொடங்கி வைத்து மாணவ, மாணவிகளுடன் முதல்வா் அமரும் கூடம் ஆகிய அனைத்தும் தயாராகவே உள்ளது. இந்த விழாவில் பங்கேற்க வரும் முதல்வருக்கு மப்பேடு கூட்டுச் சாலையில் திமுகவினா் சிறப்பான வரவேற்பு அளிக்கவும் ஏற்பாடு செய்யப்பட்டுள்ளது.

முதல்வரை வரவேற்பதற்காக திருவள்ளூா் அருகே மப்பேடு முதல் அரசு உதவி பெறும் கீழச்சேரி புனித அன்னாள் தொடக்கப் பள்ளி வரை சாலையில் பிரம்மாண்டமாக இருபுறமும் செங்கரும்பு, வாழைமரம், கட்சி கொடிகளின் தோரணம் அமைத்து வரவேற்க தயாராக உள்ளோம் என்றாா். அப்போது, சட்டப்பேரவை உறுப்பினா்கள் எஸ்.சந்திரன், வி.ஜி.ராஜேந்திரன், மாவட்ட அமைப்பாளா் நேதாஜி உள்ளிட்டோா் உடனிருந்தனா்.