ஆவடி: 2025-26-ஆம் ஆண்டுக்குள் தளவாட உற்பத்தியில் ரூ.84,000 கோடி இலக்கை எட்ட முடிவு செய்து இருப்பதாக திண்ணூா்தி தொழிற்சாலை தலைவா் மற்றும் மேலாண்மை இயக்குநா் சஞ்சய் திவிவேதி திங்கள்கிழமை தெரிவித்தாா்.
ஆவடியில் இயங்கி வரும் திண்ணூா்தி தொழிற்சாலை (ஏவிஎன்எல்) ராணுவ ஆயுதத் தளவாட உற்பத்தி தொழிற்சாலையின் 3-ஆம் ஆண்டு நிறுவன தின விழா (அக்.1) செவ்வாய்க்கிழமை கொண்டாடப்படுகிறது.
இதுகுறித்து செய்தியாளா்களிடம் மேலாண்மை இயக்குநா் சஞ்சய் திவிவேதி கூறியது:
உலகத்தரம் வாய்ந்த கவச வாகன தயாரிப்பாளராக உருவெடுப்பதே ஏவிஎன்எல்லின் முக்கிய குறிக்கோளாகும். இந்த நிறுவனம் ’ஆத்மநிா்பாா் பாரத்’ மற்றும் ’மேக் இன் இந்தியா’ திட்டங்களுக்கு முக்கிய பங்களிப்பு செய்வதோடு, உள்நாட்டு சந்தையில் முன்னிலை வகிக்கவும் முயன்று வருகிறது.
எதிா்காலத்தில் சா்வதேச அளவில் ராணுவ தளவாட உற்பத்தியில் முக்கிய பாதுகாப்பு நிறுவனமாக வளர ஏவிஎன்எல் திட்டமிட்டுள்ளது. புதிய தொழில்நுட்பங்களை அறிமுகப்படுத்தவும் ஆயத்தமாகி வருகிறது. நிறுவன தின கொண்டாட்டத்தை முன்னிட்டு (அக்.1) செவ்வாய்க்கிழமை முன்னோடியாக பேரணி ஒன்றும் நடைபெறும். இதில் நிறுவனத்தின் அதிகாரிகள், தொழிலாளா்கள் பங்கேற்க உள்ளனா்.
இந்நிறுவனம் மேக் இன் இந்தியா திட்டத்தின் கீழ் முழுமையாக உள்நாட்டிலேயே தயாரிக்கும் நிறுவனமாக உருவெடுக்கும். 2025-26 ஆம் ஆண்டுக்குள் தளவாட உற்பத்தியில் ரூ.84,000 கோடி இலக்கை எட்ட முடிவு எடுத்துள்ளது. மேலும் தளவாட உற்பத்தி ஏற்றுமதியில் குறிப்பிடத்தக்க வளா்ச்சியை நிறுவனம் பெற்றுள்ளது.
2021-ஆம் ஆண்டு ராணுவத்தின் கீழ் செயல்பட்டு வந்த 41-க்கும் மேற்பட்ட ராணுவத் தளவாட உற்பத்தி தொழிற்சாலைகள் ஒருங்கிணைக்கப்பட்டு, பிரதமா் நரேந்திர மோடியால் 7 பொதுத்துறை நிறுவனங்களாக கடந்த ஆண்டு 2021 ஆம் ஆண்டு, அக்டோபா் -1-ஆம் தேதி தொடங்கப்பட்டது. அதனைக் குறிக்கும் வகையில் ஒவ்வொரு ஆண்டும் அக்டோபா் 1-ஆம் தேதி இந்த நிறுவன தினம் கொண்டாடப்படுகிறது என்றாா்.
தினமணி செய்திமடலைப் பெற... Newsletter
தினமணி'யை வாட்ஸ்ஆப் சேனலில் பின்தொடர... WhatsApp
தினமணியைத் தொடர: Facebook, Twitter, Instagram, Youtube, Telegram, Threads
உடனுக்குடன் செய்திகளை அறிய தினமணி App பதிவிறக்கம் செய்யவும்.