1,684 பயனாளிகளுக்கு விலையில்லா பொருள்கள்

செங்கம் ஒன்றியத்துக்கு உள்பட்ட பக்கிரிபாளையம் கிராமத்தில் தமிழக அரசின் விலையில்லா மிக்ஸி, கிரைண்டர், மின் விசிறி வழங்கும் நிகழ்ச்சி சனிக்கிழமை நடைபெற்றது.

பக்கிரிபாளையம் அரசு தொடக்கப் பள்ளி வளாகத்தில் நடைபெற்ற நிகழ்ச்சிக்கு பக்கிரிபாளையம் ஊராட்சி மன்றத் தலைவர் முருகன் தலைமை வகித்தார். மாவட்ட வணிகவரித் துறை ஆலோசனைக் குழு உறுப்பினர் ஆர்.மதியழகன், செங்கம் ஒன்றியக் குழுத் தலைவர் எம்.கணேசன், துணைத் தலைவர் சாமிநாதன் ஆகியோர் முன்னிலை வகித்தனர். வட்டாட்சியர் காமராஜ் வரவேற்றார். திருவண்ணாமலை தொகுதி எம்பி ஆர்.வனரோஜா பங்கேற்று 1,684 பயனாளிகளுக்கு தமிழக அரசின் விலையில்லா மிக்ஸி, கிரைண்டர், மின் விசிறி ஆகியவற்றை வழங்கினார். ஊராட்சி மன்றத் துணைத் தலைவர் பஞ்சாட்சரம், கிராம நிர்வாக அலுவலர் நேரு உள்பட கிராம மக்கள் கலந்துகொண்டனர்.