மணல் கடத்தல்: 3 பேர் கைது

செய்யாறு அருகே ஆற்று மணல் கடத்தியதாக 2 டிராக்டர், 3 மாட்டு வண்டிகளை போலீஸார் பறிமுதல் செய்ததுடன், 3 பேரை கைதும் செய்தனர்.
 செய்யாறை அடுத்த காழியூர் கிராமப் பகுதியில் செய்யாறு போலீஸார் புதன்கிழமை தீவிர மணல் கடத்தல் தடுப்புச் சோதனையில் ஈடுபட்டனர். அப்போது, செய்யாறு ஆற்றுப்படுகையில் இருந்து அந்த வழியாக உரிய அனுமதியில்லாமல் ஆற்று மணலை ஏற்றி வந்த 2 டிராக்டர்கள், 3 மாட்டு வண்டிகளை போலீஸார் பறிமுதல் செய்தனர். மேலும், மாட்டு வண்டிகளில் வந்த காழியூர் கிராமத்தைச் சேர்ந்த அசோக்குமார் (25), உதயகுமார் (30), வெங்கடேசன் (25) ஆகியோரை கைது செய்தனர். தப்பியோடிய டிராக்டர் ஓட்டுநர்கள் இருவரை போலீஸார் தேடி வருகின்றனர்.