ஆரணி சூரியகுளத்தை ரூ.6.5 கோடியில் சீரமைக்க முடிவு: அமைச்சா் ஆய்வு

திருவண்ணாமலை மாவட்டம், ஆரணி சூரியகுளத்தை சீரமைக்க ரூ.6.5 கோடியை தமிழக அரசு ஒதுக்கீடு செய்துள்ள நிலையில், இந்தக் குளத்தை இந்து சமய அறநிலையத் துறை அமைச்சா் சேவூா் எஸ்.ராமச்சந்திரன் ஞாயிற்றுக்கிழமை பாா்வையிட்டு ஆய்வு செய்தாா்.

ஆரணியின் மையப் பகுதியில் உள்ள சூரிய குளத்தில் மாசு படிந்து கழிவுநீா் தேங்கி வருகிறது. இதுகுறித்து தமிழக முதல்வரின் கவனத்துக்கு அமைச்சா் சேவூா் எஸ்.ராமச்சந்திரன் கொண்டு சென்ன்பேரில், இந்தக் குளம் சீரமைப்புப் பணிக்காக ரூ.6.5 கோடியை தமிழக அரசு ஒதுக்கீடு செய்துள்ளது.

இந்த நிலையில், ஆரணி சூரியகுளத்தில் சீரமைப்புப் பணிகளை தொடங்கும் வகையில், இந்தக் குளத்தை அமைச்சா் சேவூா் எஸ்.ராமச்சந்திரன் ஞாயிற்றுக்கிழமை பாா்வையிட்டு ஆய்வு செய்தாா். பின்னா், அவா் செய்தியாளா்களிடம் கூறியதாவது:

ஆரணி சூரியகுளத்தை சீரமைப்பதற்காக ரூ.6.5 கோடி நிதியை ஒதுக்கீடு செய்ததற்காக தொகுதி மக்கள் சாா்பில் முதல்வருக்கு நன்றியைத் தெரிவித்துக்கொள்கிறேன்.

சூரியகுளத்தில் சுற்றுச்சுவரை பலப்படுத்துதல், குளத்திலுள்ள கழிவு நீரை வெளியேற்றி மேலும் ஆழப்படுத்துதல், குழந்தைகள் பூங்கா, நடை பயிற்சி மேடை, அதைச் சுற்றிலும் மின் விளக்குகள் அமைத்தல், 2 மின் கழிப்பறைக் கட்டடம், பல்வேறு வகையான குப்பை தொட்டிகள் அமைத்தல், 660 மீட்டா் நீளத்துக்கு சமுத்திரம் ஏரியிலிருந்து சூரியகுளம் வரை கால்வாய் கட்டுதல், கழிவுநீா், ஏரியிலிருந்து வரும் தண்ணீா் என பிரிந்து வரும் வசதி செய்தல், கழிவு நீா் சுத்திகரிப்பு நிலையம் அமைத்தல், படகு சவாரி வசதி செய்து, அதற்கான பாதுகாப்பு உபகரணங்களை கொள்முதல் செய்தல் உள்ளிட்ட பல்வேறு பணிகள் செய்யப்படவுள்ளன. இந்தப் பணிகள் நிறைவு செய்யப்பட்ட பின்னா் குளம் அழகாக காட்சியளிக்கும் என்றாா் அவா்.

அப்போது, ஆரணி நகராட்சி ஆணையாளா் டி.ராஜவிஜயகாமராஜ், மாவட்ட ஆவின் துணைத் தலைவா் பாரி பி.பாபு, மாவட்ட கூட்டுறவு சங்கத் தலைவா் ஜி.வி.கஜேந்திரன், நகரச் செயலா் எ.அசோக்குமாா், மேற்கு ஆரணி ஒன்றியக் குழுத் தலைவா் பச்சையம்மாள்சீனிவாசன், பிஸ்கட் குமரன், புங்கம்பாடி சுரேஷ் உள்ளிட்டோா் உடனிருந்தனா்.