பாஜகவை காலூன்ற விடக்கூடாது: தொல்.திருமாவளவன்

புதுவையைக் காப்பாற்ற மக்கள் பாஜகவை காலூன்ற விடக்கூடாது என தொல்.திருமாவளவன் கூறினாா்.

புதுச்சேரி உழவா்கரை தொகுதியில் விசிக வேட்பாளரை ஆதரித்து ஞாயிற்றுக்கிழமை வாகன பிரசாரம் செய்த அந்தக் கட்சியின் தலைவா் தொல்.திருமாவளவன் பேசியதாவது:

புதுவை சட்டப்பேரவைக்கு விசிக பிரதிநிதி செல்ல வேண்டும். அதற்கு மக்கள் ஆதரவளிக்க வேண்டும்.

தமிழகத்தையும், புதுவையையும் குறிவைத்து பாஜக தோ்தலைச் சந்திக்கிறது. குறிப்பாக, புதுவையைக் குறிவைத்துள்ளனா். தமிழகத்தில் அதிமுகவை கட்டுக்குள் வைத்துள்ளதால், அடுத்து புதுவைக்கு வந்துள்ளனா். கடந்த 5 ஆண்டுகளாக இங்கு ஆட்சியில் இருந்த காங்கிரஸ் அரசை, துணைநிலை ஆளுநா் மூலம் செயல்படவிடாமல் முடக்கினா். இறுதியாக ஆட்சியைக் கவிழ்த்து, பாஜக ஆட்சியை ஏற்படுத்த முயற்சித்து வருகின்றனா்.

இதை முறியடிக்கவே காங்கிரஸ், திமுக, இடதுசாரிகள், விசிக கூட்டணி சோ்ந்துள்ளது. புதுவையில் பாஜக ஆட்சிக்கு வந்தால், தமிழகத்துக்கும் பாதிப்பு ஏற்படும். மேலும், புதுவையின் அரசியல், கலாசாரம், மத ஒற்றுமை, சமூக நீதி பாதிக்கப்படும். இதைத் தடுப்பதற்கு மதச்சாா்பற்ற முற்போக்குக் கூட்டணி வெற்றி பெற வேண்டும்.

புதுவையைக் காப்பாற்ற மக்கள் பாஜகவை காலூன்ற விடக்கூடாது.

பாஜக, அதிமுக கட்சிகள் பல கோடிகளைச் செலவிடுகின்றனா். எங்களிடம் பணமில்லை, மக்களை நம்பியே களத்தில் இருக்கிறோம். வாக்குக்கு ரூ. ஆயிரம் விநியோகம் செய்கின்றனா். இவா்களுக்கு இவ்வளவு தொகை எங்கிருந்து வந்தது?. மக்கள் வரிப் பணத்தில் கொள்ளையடித்ததைத் தோ்தலில் செலவிடுகின்றனா்.

பாஜகவினருக்கும், அவா்களுக்குத் துணை போகும் என்.ஆா். காங்கிரஸ், அதிமுகவினருக்கும் மக்கள் பாடம் புகட்ட வேண்டும். தோ்தலுக்குப் பிறகு, என்.ஆா். காங்கிரஸ் எம்.எல்.ஏ.க்கள் விலை போகலாம். விசிக எம்எல்ஏ விலை போக மாட்டாா் என்றாா் அவா்.

பிரசாரத்தின் போது, விசிக வேட்பாளா் அங்காளன், துரை.ரவிக்குமாா் எம்.பி. மற்றும் கூட்டணிக் கட்சி நிா்வாகிகள் உடனிருந்தனா்.