செங்கம், சேத்துப்பட்டு ஒன்றியத்தில் அம்மா சிறு மருத்துவமனைகள்: அமைச்சா் தொடக்கிவைத்தாா்.

திருவண்ணாமலை மாவட்டம், செங்கம், சேத்துப்பட்டு ஒன்றியங்களில் அமைக்கப்பட்ட அம்மா சிறு மருத்துவமனைகளை அமைச்சா் சேவூா் ராமச்சந்திரன் தொடக்கிவைத்தாா்.

செங்கம் ஊராட்சி ஒன்றியத்துக்கு உள்பட்ட கட்டமடுவு கிராமத்தில் தமிழக அரசின் சிறு மருத்துவமனை தொடக்க விழா வெள்ளிக்கிழமை இரவு நடைபெற்றது.

நிகழ்ச்சிக்கு மாவட்ட ஆட்சியா் சந்தீப் நந்தூரி தலைமை வகித்தாா். சிறப்பு அழைப்பாளராக அமைச்சா் சேவூா் எஸ்.ராமச்சந்திரன் கலந்துகொண்டு அம்மா சிறு மருத்துவமனையைத் தொடக்கிவைத்தாா்.

சேத்துப்பட்டு ஒன்றியத்தில்...

முன்னதாக, சேத்துப்பட்டு ஊராட்சி ஒன்றியத்துக்கு உள்பட்ட ஓதலவாடி, மன்சுராபாத், பெரணம்பாக்கம் ஆகிய ஊராட்சிகளில் அம்மா சிறு மருத்துவமனைகளை அமைச்சா் சேவூா் எஸ்.ராமச்சந்திரன் குத்துவிளக்கேற்றி தொடக்கிவைத்தாா்.

இதைத் தொடா்ந்து, அவா் கா்ப்பிணித் தாய்மாா்களுக்கு ஊட்டச்சத்து பெட்டகம், குழந்தை பெற்ற தாய்மாா்களுக்கு குழந்தைகள் நலப் பெட்டகங்களை வழங்கினாா்.

மேற்கண்ட நிகழ்ச்சிகளில் மாவட்ட சுகாதாரப் பணிகள் இணை இயக்குநா் அஜிதா, ஆவின் தலைவா் அக்ரி கிருஷ்ணமூா்த்தி, அதிமுக செங்கம் மேற்கு ஒன்றியச் செயலா் மகரிஷிமனோகரன், கிழக்கு ஒன்றியச் செயலா் அருணாச்சாலம், மாவட்டச் இணைச் செயலா் அமுதா, ஊராட்சி மன்றத் தலைவா் ஜெயலட்சுமி, செங்கம் வட்டார மருத்துவ அலுவலா் சுரேஷ், சேத்துப்பட்டு ஒன்றியச் செயலா்கள் பி.ராகவன், ஏ.ஸ்ரீதா், ஊராட்சிமன்றத் தலைவா்கள் முருகன், லலிதா, தேன்மொழி, அல்லி, மணிகண்டன் உள்ளிட்டோா் கலந்துகொண்டனா்.