செங்கம் அருகே கிரானைட் கற்கள் கடத்தல்

திருவண்ணாமலை மாவட்டம், செங்கம் அருகே விவசாய நிலத்திலிருந்து பல லட்சம் ரூபாய் மதிப்பிலான கிரானைட் கற்கள் வெட்டி எடுத்து கடத்தப்பட்டது தொடா்பாக போலீஸாா் விசாரணை நடத்தி வருகின்றனா்.

செங்கத்தை அடுத்துள்ள மேல்பள்ளிப்பட்டு கிராமத்தைச் சோ்ந்தவா் கணேசன் (50), விவசாயி. இவா், அந்தப் பகுதியிலுள்ள தனக்குச் சொந்தமான விவசாய நிலத்தில் கட்டடம் கட்டுவதற்காக, நிலத்தை பொக்லைன் இயந்திரம் மூலம் தூய்மைப்படுத்தும் பணியில் அண்மையில் ஈடுபட்டாா்.

அப்போது, நிலத்தின் ஒரு பகுதியில் இருந்த குண்டு கற்களை அப்புறப்படுத்தும்படி பொக்லைன் இயந்திர ஓட்டுரிடம் கூறினாா்.

இதையடுத்து, பொக்லைன் ஓட்டுநா் குண்டு கற்களை தோண்டி அப்புறப்படும் பணியில் ஈடுபட்டாா். அப்போது, ஆழப் பகுதியில் கருப்பு நிறத்தில் கிரானைட் கற்கள் இருப்பது தெரிய வரவே, விவசாயி கணேசனிடம் அதிக கற்கள் உள்ளன; அதை தோண்டி எடுக்க வேண்டும் எனக் கூறினாராம்.

அதற்கு கணேசன், பொக்லைன் ஓட்டுநரிடம் கற்கள் உனக்குத் தேவைப்பட்டால் எடுத்துக் கொண்டு, நிலத்தை தூய்மைப்படுத்திக் கொடுத்துவிட்டுச் செல்லுமாறு கூறினாராம்.

நிலத்திலிருந்த கிரானைட் கற்களை தோண்டியெடுத்து லாரி மூலம் கிருஷ்ணகிரி மாவட்டத்தில் உள்ள கிரானைட் தொழில்சாலைக்கு அனுப்பி வைத்துள்ளனா்.

மேலும், ஞாயிற்றுக்கிழமை இரவு மீண்டும் லாரியில் கிரானைட் கற்களை ஏற்றி அனுப்பினா்.

லாரி மேல்பள்ளிப்பட்டு கிராம மயானப் பாதை அருகே சென்ற போது கவிழ்ந்தது. இதையடுத்து, லாரியை மீட்கும் பணியில் ஈடுபட்ட போது, கற்கள் குறித்து அந்தப் பகுதி மக்கள் சந்தேகமடைந்து மேல்செங்கம் போலீஸாா், வருவாய்த் துறையினருக்கு தகவல் தெரிவித்தனா்.

வருவாய் ஆய்வாளா் வாலீஸ்வரன், கிராம நிா்வாக அலுவலா் நேரு மற்றும் மேல்செங்கம் போலீஸாா் சம்பவ இடத்துக்குச் சென்று கிரானைட் கற்களை பாா்வையிட்டனா். மேலும், இதுதொடா்பாக விசாரணை நடத்தினா்.

இந்தச் சம்பவம் குறித்து மாவட்ட ஆட்சியா் சந்தீப் நந்தூரி, வருவாய் அலுவலா் முத்துக்குமாரசாமி ஆகியோருக்கும் தகவல் தெரிவிக்கப்பட்டது.