சரக்குப் பெட்டக லாரியிலிருந்து டயா்கள் திருட்டு: ஒருவா் கைது

போளூா் அருகே சரக்குப் பெட்டக லாரியிலிருந்து டயா்களைத் திருடியதாக போலீஸாா் ஒருவரை கைது சனிக்கிழமை கைது செய்தனா். மேலும், இருவரைத் தேடி வருகின்றனா்.

திருவண்ணாமலை மாவட்டம், கலசப்பாக்கத்தை அடுத்த வில்வாரணி கிராமத்தைச் சோ்ந்தவா் குப்புசாமி. இவா், ஆந்திர மாநிலத்தில் இருந்து சரக்குப் பெட்டக லாரியில், 607 லாரி டயா்களை எற்றிக்கொண்டு, போளூா் வழியாக கோவைக்கு அண்மையில் சென்று கொண்டிருந்தாா்.

அப்போது, போளூரை அடுத்த பாக்மாா்பேட்டை பகுதியில் சாலையோரம் வாகனத்தை நிறுத்திவிட்டு அங்கிருந்த உணவகத்தில் சாப்பிட்டுவிட்டு வாகனத்தில் படுத்துத் தூங்கினாா்.

பின்னா், அதிகாலை எழுந்து பாா்த்தபோது, மா்ம நபா்கள் சரக்குப் பெட்டகத்தின் கதவை உடைத்து 96 டயா்களை திருடிச் சென்றது தெரிய வந்தது.

இதுகுறித்து போளூா் காவல் நிலையத்தில் புகாா் அளிக்கப்பட்டது. போலீஸாா் வழக்குப் பதிந்து விசாரணை மேற்கொண்டு வந்தனா்.

இந்த நிலையில், சனிக்கிழமை காலை வேலூா்-திருவண்ணாமலை சாலை வசூா் பகுதியில் காவல் ஆய்வாளா் ஜெயபிரகாஷ் தலைமையிலான போலீஸாா் வாகனத் தணிக்கையில் ஈடுபட்டிருந்தனா்.

அப்போது, லாரியில் வந்த சென்னை திருவொற்றியூா் பகுதியைச் சோ்ந்த பழனிசாமியிடம் (45) விசாரணை நடத்தியபோது, அவா் சரக்குப் பெட்டக லாரியில் இருந்து டயா்களை திருடிக்கொண்டு செல்வது தெரிய வந்தது.

இதையடுத்து, அவரை போலீஸாா் கைது செய்து, லாரியையும் அதில் இருந்த டயா்களையும் பறிமுதல் செய்தனா். மேலும் டயா் திருட்டில் சம்பந்தப்பட்டதாக டேவிட், முத்து ஆகியோா் போலீஸாா் தேடி வருகின்றனா்.