போளூா்: கலசப்பாக்கம் அருகே கோயில் ஆடிக் கிருத்திகை விழாவுக்காக மின் விளக்கு அலங்காரம் செய்யும் பணியில் ஈடுபட்டிருந்த தொழிலாளி தவறி கீழே விழுந்து உயிரிழந்தாா். இதையடுத்து, உயிரிழந்தவா் குடும்பத்துக்கு உரிய நிவாரணம் வழங்கக் கோரி உறவினா்கள் சாலை மறியலில் ஈடுபட்டனா்.
திருவண்ணாமலை மாவட்டம், கலசப்பாக்கத்தை அடுத்த பூண்டி கிராமத்தைச் சோ்ந்தவா் குப்புசாமி மகன் ராஜமாணிக்கம் (47), எலக்ட்ரிஷியன்.
இவா், திங்கள்கிழமை இரவு வில்வாரணி சிவசுப்பிரமணியா் கோயிலில் ஆடிக் கிருத்திகை விழாவுக்காக மின் விளக்கு அலங்காரம் செய்யும் பணியில் ஈடுபட்டிருந்தாா்.
அப்போது, கோயில் கோபுரத்தின் மீது மின் விளக்குகளை பொருத்திவிட்டு, கோபுர பொம்மைகளை பிடித்து கீழே இறங்கும்போது, பொம்மை உடைந்து தவறி கீழே விழுந்து பலத்த காயமடைந்தாா்.
அங்கிருந்தவா்கள் அவரை மீட்டு கலசப்பாக்கம் அரசு மருத்துவமனைக்கு அழைத்துச் சென்றனா்.
அங்கு பரிசோதித்த மருத்துவா்கள் ராஜமாணிக்கம் ஏற்கெனவே இறந்துவிட்டதாகத் தெரிவித்தனா்.
இதுகுறித்து கலசப்பாக்கம் போலீஸாா் வழக்குப் பதிந்து விசாரணை நடத்தி வருகின்றனா்.
இந்த நிலையில், ராஜமாணிக்கத்தின் உறவினா்கள், அவரது குடும்பத்துக்கு அரசு நிவாரணம் வழங்கவேண்டும், குடும்பத்தில் ஒருவருக்கு அரசு வேலை வழங்கவேண்டும் எனக் கேட்டு, பூண்டி கிராமத்தில் கலசப்பாக்கம்-வில்வாரணி சாலையில் மறியலில் ஈடுபட்டனா்.
தகவல் அறிந்த வட்டாட்சியா் ராஜராஜேஸ்வரி,திமுக ஒன்றியச் செயலா் சிவக்குமாா் ஆகியோா் வந்து, இந்து சமய அறநிலையத் துறையிடம் பேசி உரிய நடவடிக்கை எடுப்பதாகத் தெரிவித்தனா்.
இதை ஏற்று மறியலில் ஈடுபட்டவா்கள் கலைந்து சென்றனா்.
தினமணி செய்திமடலைப் பெற... Newsletter
தினமணி'யை வாட்ஸ்ஆப் சேனலில் பின்தொடர... WhatsApp
தினமணியைத் தொடர: Facebook, Twitter, Instagram, Youtube, Telegram, Threads
உடனுக்குடன் செய்திகளை அறிய தினமணி App பதிவிறக்கம் செய்யவும்.