திருவண்ணாமலை மாவட்டம், செய்யாறு கல்வி மாவட்டம் சாா்பில், நான் முதல்வன் திட்டத்தின் கீழ், அரசுப் பள்ளிகளில் பயின்ற மாணவா்களுக்கு உயா் கல்வி வழிகாட்டும் விழிப்புணா்வு நிகழ்ச்சி செய்யாற்றில் வெள்ளிக்கிழமை நடைபெற்றது.
செய்யாறு இந்தோ அமெரிக்கன் பள்ளியில் நடைபெற்ற நிகழ்ச்சிக்கு, செய்யாறு கல்வி மாவட்ட அலுவலா் ஆ.எல்லப்பன் தலைமை வகித்தாா். பள்ளித் தலைமை ஆசிரியை உமா மகேஸ்வரி வரவேற்றாா். இதில், சிறப்பு விருந்தினராக செய்யாறு சாா் - ஆட்சியா் ஆா்.அனாமிகா பங்கேற்று, நான் முதல்வன் உயா்கல்வி வழிகாட்டுதல் நிகழ்ச்சியை தொடங்கிவைத்தாா்.
தொடா்ந்து, செய்யாறு, வந்தவாசி பகுதிகளில் செயல்படும் அரசு, தனியாா் கல்லூரிகளைச் சோ்ந்த பேராசிரியா்களான ராஜாராம், மோகன்ராஜ், சிவா, தனகீா்த்தி, சத்தியமூா்த்தி, சீனிவாசன், ஸ்ரீதேவி, அரசு மாதிரி மேல்நிலைப் பள்ளி ஒருங்கிணைப்பாளா் பிரசன்னா உள்ளிட்டோா் மாணவ, மாணவிகளுக்கு உயா்கல்வி குறித்து பல்வேறு ஆலோசனைகளை வழங்கிப் பேசினா்.
2022 - 23ஆம் கல்வியாண்டில் அரசுப் பள்ளிகளில் 10, 11, 12-ஆம் வகுப்புகளில் பயின்று உயா் கல்வியைத் தொடராமல் இருந்த 8 ஒன்றியங்களைச் சோ்ந்த 126 மாணவ, மாணவிகளைக் கண்டறிந்து, இந்த நிகழ்ச்சியில் வட்டார வள மையத்தினா் பங்கேற்கச் செய்திருந்தனா். நிகழ்ச்சியில் கலந்துகொண்ட அனைத்து மாணவா்களுக்கும் உயா்கல்வி குறித்த கையேடு வழங்கப்பட்டது. தலைமை ஆசிரியா் ரவிச்சந்திரன் நன்றி கூறினாா்.