திருவண்ணாமலையில் இன்று காா்த்திகை தீபத்திருவிழா: பக்தா்கள் குவிந்தனா்

திருவண்ணாமலையில் புதன்கிழமை (டிச.3) காா்த்திகை தீபத் திருவிழா கோலாகலமாக நடைபெறவுள்ளது. இந்த விழாவில் தரிசனம் செய்ய திரளான பக்தா்கள் குவிந்த வண்ணம் உள்ளனா்.

திருவண்ணாமலை அருணாசலேஸ்வரா் கோயிலில் காா்த்திகை தீபத்திருவிழா கடந்த நவ.24-ஆம் தேதி கொடியேற்றத்துடன் தொடங்கி நடைபெற்று வருகிறது.

தீபத்திருவிழாவின் 9-ஆம் நாளான ஸ்ரீசந்திரசேகரா் புருஷா மிருக வாகனத்தில் மாடவீதியில் பவனி வந்து பக்தா்களுக்கு அருள்பாலித்தாா்.

இதில், முக்கிய நிகழ்வான டிச.3-ஆம் தேதி மகா தீப திருவிழா நடைபெற உள்ளது. புதன்கிழமை அதிகாலை 4 மணிக்கு அருணாசலேஸ்வரா் கோயில் சுவாமி சந்நிதி கருவறை எதிரில் பரணி தீபம் ஏற்றப்படும். அதைத் தொடா்ந்து மாலை 6 மணிக்கு 2,668 அடி உயர மலை மீது மகா தீபம் ஏற்றப்படும். இதற்காக கொப்பரையும், திரியும் உரிய பூஜைகள் செய்யப்பட்டு செவ்வாய்க்கிழமை மலைக்கு கொண்டு செல்லப்பட்டன.

ஆண்டுக்கு ஒரு முறை சில நிமிடங்கள் மட்டுமே காட்சி தரும் அா்த்தநாரீஸ்வரா் ஆனந்த தாண்டவம் ஆடியபடி கோயில் மூன்றாம் பிரகாரத்தில் பக்தா்களுக்கு காட்சி தருவாா்.

கோயிலில் அதிகாலை பரணி தீபத்தை தரிசிக்கவும் மாலை கோயிலில் இருந்து மகா தீபத்தையும் அா்த்தநாரீஸ்வரரையும் தரிசனம் செய்வதற்கும் இடவசதிக்கு ஏற்றவாறு பக்தா்கள் கோயிலுக்குள் அனுமதிக்கப்படுவாா்கள்.

கோயில் வண்ண மின்விளக்குகள் மற்றும் மலா் அலங்காரங்களால் அலங்கரிக்கப்பட்டு கைலாயம் போல காட்சியளிக்கிறது.

மகா தீபத்தை தரிசிக்க நாட்டின் பல்வேறு பகுதிகளில் இருந்து லட்சக்கணக்கான பக்தா்கள் திருவண்ணாமலையில் குவிந்து வருவதால் நகரம் விழாக் கோலம் பூண்டுள்ளது.

பாதுகாப்பு ஏற்பாடுகள்

காா்த்திகை தீபத்தை தரிசிக்க நிகழாண்டு 40 லட்சத்துக்கு மேற்பட்ட பக்தா்கள் வருவாா்கள் என எதிா்பாா்க்கப்படுகிறது. இதையொட்டி, பலத்த போலீஸ் பாதுகாப்பு ஏற்பாடுகள் செய்யப்பட்டுள்ளன.

வடக்கு மண்டல ஐஜி அஸ்ரா காா்க் தலைமையில் 5 டிஐஜிக்கள், 32 எஸ்.பி.க்கள் உள்பட 15 ஆயிரம் போலீஸாா் பாதுகாப்புப் பணியில் ஈடுபடுகின்றனா்.

அதேபோல 60 சிறப்பு கமாண்டோ படைவீரா்கள், 24 தீயணைப்பு வாகனங்களுடன் 640 தீயணைப்பு வீரா்கள், 180 வனத்துறையினா் அவசர கால பணிக்காக ஈடுபடுத்தப்படுகின்றனா்.

67 இடங்களில் கண்காணிப்பு கோபுரங்களும், 74 இடங்களில் காவல் உதவி மையங்களும் அமைக்கப்பட்டுள்ளன. திருக்கோயில் மாடவீதிகள் நகரின் முக்கிய வீதிகள் மற்றும் கிரிவலப் பாதையில் சுழலும் கண்காணிப்பு கேமராக்கள் உள்பட 1,024 சிசிடிவி கேமராக்கள் பொருத்தப்பட்டு கண்காணிக்கப்படுகிறது.

நிகழாண்டு முதல்முறையாக தீபத் திருவிழா கண்காணிப்பு பணியில் செயற்கை நுண்ணறிவு (ஏஐ) கேமராக்கள் பயன்படுத்தப்படுகின்றன. சுமாா் ரூ.75 லட்சத்தில் அதற்கான ஏற்பாடுகள் செய்யப்பட்டுள்ளன.

கோயில் மாட வீதிகள், கிரிவலப்பாதை மற்றும் நகரின் முக்கிய இடங்களில் பாதுகாப்பு பலப்படுத்தப்பட்டுள்ளது. பக்தா்களின் வசதிக்காக தமிழகத்தின் பல்வேறு மாவட்டங்களில் இருந்தும் ஆந்திரம், தெலங்கானா, கா்நாடகம், புதுவை உள்பட பிற மாநிலங்களிலிருந்தும் 5,484 சிறப்புப் பேருந்துகள் இயக்கப்பட உள்ளது.

அதேபோல, சென்னையில் இருந்து காட்பாடி வழியாகவும், பல்வேறு வழித்தடங்களிலிருந்தும் திருவண்ணாமலைக்கு 16 சிறப்பு ரயில்கள் இயக்கப்படுகின்றன.

திருவண்ணாமலை நகரை இணைக்கும் பிரதான சாலைகளில் 24 இடங்களில் தற்காலிக பேருந்து நிலையங்கள் அமைக்கப்பட்டுள்ளன. 130 இடங்களில் காா் பாா்க்கிங் வசதி செய்யப்பட்டுள்ளது. அங்கு 12 ஆயிரம் காா் மற்றும் வேன்கள் நிறுத்த வசதி செய்யப்பட்டுள்ளது.

மலை ஏற பக்தா்களுக்குத் தடை

பலத்த மழை காரணமாக இந்த ஆண்டு மண் சரிவு ஏற்படுவதற்கான வாய்ப்பு உள்ளதாக வல்லுநா் குழு அளித்த அறிக்கையின் அடிப்படையில் மகா தீபத்தின்போது, மலை ஏற பக்தா்களுக்கு தடை விதிக்கப்பட்டுள்ளது.