மான் வேட்டைக்குச் சென்ற இருவா் மின் வேலியில் சிக்கி உயிரிழப்பு: போலீஸாா் தீவிர விசாரணை

செங்கம் அருகே செவ்வாய்க்கிழமை இரவு மான் வேட்டைக்குச் சென்ற இருவா் மின் வேலியில் சிக்கி உயிரிழந்தனா்.

உடல்களை கிணற்றில் வீசியது யாா் என்பது குறித்து போலீஸாா் தீவிர விசாரணை மேற்கொண்டு வருகின்றனா்.

செங்கத்தை அடுத்த குப்பனத்தம் கிராமத்தைச் சோ்ந்தவா்கள் அருண்குமாா்(17), சாமுண்டி(27), அரீஷ் (16), சிலம்பு(27), இவா்கள் நான்கு பேரும் மான், முயல்களை வேட்டையாட ஜவ்வாதுமலை அடிவாரமான குப்பனத்தம் வனப்பகுதிக்கு சென்றுள்ளனா்.

அப்போது அரிஷ், சிலம்பு ஒருபுறமும், அருண்குமாா், சாமுண்டி ஒருபுறமும் சென்றுள்ளனா். அரீஷ், சிலம்பு இருவருக்கும் காட்டுமுயல் கிடைத்துள்ளது. அதை எடுத்துக்கொண்டு அவா்கள் இரவு வீடு திரும்பியுள்ளனா்.

அருண்குமாா், சாமுண்டி வீட்டிற்கு வரவில்லை. அதனால் இருவரின் உறவினா்கள் அரீஷ், சிலம்பை கேட்டபோது நாங்கள் ஒருபுறம் இருந்தோம், அவா்கள் மற்றொருபுறம் இருந்தாா்கள். அவா்கள் என்ன ஆனாா்கள் என்பது தெரியவில்லை என்றனா்.

பின்னா் புதன்கிழமை மாலை வரை இருவா் குறித்து தகவல் தெரியாமல் காட்டுப் பகுதியில் உறவினா் தேடியுள்ளனா்.

இதனிடையே, குப்பனத்தம் பகுதியில் உள்ள விவசாயி சேட்டு நிலத்தில் உள்ள விவசாயக் கிணற்றில் இருவா் இறந்து மிதப்பதாக தகவல் கிடைத்து ஊா்மக்கள் சென்று பாா்த்தனா். பின்னா், தீயணைப்புப் படையினா் உதவியுடன் புதன்கிழமை இரவு அருண்குமாா், சாமுண்டி உடல்கள் கிணற்றில் இருந்து எடுக்கப்பட்டன.

இதைத் தொடா்ந்து செங்கம் போலீஸாருக்கு தகவல் தெரிவிக்கப்பட்டு அவா்கள் வந்து சடலங்களை கைப்பற்றி உடல்கூறாய்வுக்காக அனுப்பிவைத்தனா்.

பின்னா், போலீஸாா் மேற்கொண்ட விசாரணையில், சேட்டு நிலத்திற்கு பக்கத்தில் வன விலங்குகள் வராமல் தடுக்க விவசாயி பாஷா என்பவா் நிலத்தில் இரவு மின் வேலி அமைத்திருந்தால் அதில் சிக்கி இருவரும் இறந்துள்ளதும், இது வெளியில் தெரியாமல் இருப்பதற்கு உடல்களை கிணற்றில் வீசியிருக்கலாம் என அப்பகுதி மக்கள் கூறி வருகின்றனா்.

இதனால் விவசாயிகள் பாஷா, சேட்டு மற்றும் உடன் சென்ற அரீஷ், சிலம்பு ஆகிய நான்கு பேரை செங்கம் போலீஸாா் அழைந்துச் சென்று தனித்தனியாக விசாரணை மேற்கொண்டு வருகின்றனா்.