மகா சிவராத்திரி: திருவண்ணாமலையில் 24 மணி நேர சிறப்பு இசை நிகழ்ச்சி!

மகா சிவராத்திரியையொட்டி, திருவண்ணாமலை அருணாசலேஸ்வரா் கோயில் முன் உலக நன்மைக்காக 108 நாகஸ்வர கலைஞா்கள், 108 தவில் கலைஞா்கள் பங்கேற்ற 24 மணிநேர சிறப்பு இசை நிகழ்ச்சி நடைபெற்றது.

திருவண்ணாமலை மாவட்ட கிரிவல நாகஸ்வரம், தவில் இசை சங்கம் சாா்பில் 45-ஆம் ஆண்டாக இந்த இசை விழா ஞாயிற்றுக்கிழமை அதிகாலை 5 மணிக்குத் தொடங்கி மறுநாள் காலை 5 மணி வரை நடைபெற்றது.

கோயில் ராஜகோபுரம் முன் நாகஸ்வர தமிழக அரசு விருது பெற்ற கலை இளமணிகள் டி.ஆா்.பி.கே.ஆருரன் டி.ஆா்.பி.கே.நித்யானந்தம் ஆகியோரது மங்கள இசையுடன் விழா தொடங்கியது.

அருணாசலேஸ்வரா் கோயில் தக்காா் உ.மீனாட்சிசுந்தரம், இணை ஆணையா் ஜெ.பரணிதரசன் ஆகியோரது வழிகாட்டுதலின் பேரில் நடைபெற்ற இந்த இசை நிகழ்ச்சிக்கு சங்கத் தலைவரும், நாகஸ்வர கலைமாமணியுமான டி.ஆா்.பிச்சாண்டி தலைமை வகித்தாா். தவில் இசை சங்கத்தின் துணைத் தலைவா் கலைமாமணி டி.ஆா்.பி. காா்த்திகேயன் முன்னிலை வகித்தாா். செயலா் ஏ.கே. ஏழுமலை வரவேற்றாா்.

இரவில் தருமபுர ஆதீன ஆஸ்தான நாகஸ்வர கலைஞா் டி.எஸ்.எம்.உமாசங்கா், எம்.ஏ.சீனிவாசன், எஸ்.ஜெயசூா்யா ஆகியோரது சிறப்பு நாகஸ்வர நிகழ்ச்சியும், பிக்கம்பட்டி பி.ஆா்.வெங்கடேஷ், திருப்பத்தூா் பி.ஆா்.சுமன், மேல்சாணங்குப்பம் எம்.எஸ்.எம். செல்வகுமாா் ஆகியோரது சிறப்பு தவில் நிகழ்ச்சியும் நடைபெற்றது. மேலும் தவில், வாய்ப்பாட்டு, பரதநாட்டியம் ஆகிய நிகழ்ச்சிகளும் நடைபெற்றன.

இந்த விழாவுக்கான ஏற்பாடுகளை தவில், நாகஸ்வர இசைக் கலைஞா்கள் சங்கச் செயலா் ஏ.கே.ஏழுமலை, துணைச் செயலா் டி.ஆா்.பி. காா்த்திகேயன், துணைத் தலைவா் டி.குமரன், இணைச் செயலா்கள் எஸ்.கே.குருமூா்த்தி, இ.சரவணன், எஸ்.கே.ராமலிங்கம் உள்ளிட்டோா் செய்திருந்தனா்.

இந்த விழாவையொட்டி மாசி மகா சிவராத்திரி விழாவில் கலந்து கொண்ட பக்தா்களுக்கு அன்னதானம் மற்றும் சுவாமி பிரசாதம் வழங்கப்பட்டது. இந்த இசை விழாவை கிரிவலம் சென்ற பக்தா்கள் கண்டுகளித்தனா்.