குடும்பத் தகராறில் விபரீதம்! வீட்டில் சமையல் எரிவாயு உருளை திறந்து தீ வைத்த கணவா்: குழந்தைகள் உள்பட 4 போ் காயம்

செங்கம் அருகே குடும்பத் தகராறில் வீட்டில் சமையல் எரிவாயு சிலிண்டரை திறந்துவிட்டு தீ விபத்து ஏற்படுத்திய கணவன் உள்ளிட்ட 4 போ் பலத்த காயம் அடைந்தனா்.

செங்கத்தை அடுத்த பெரியகல்தாம்பாடி கிராமத்தைச் சோ்ந்தவா் சக்திவேல் (37). இவா் தனியாா் எரிவாயு உருளை விநியோகிக்கும் முகமையில் லாரி ஓட்டுநராக பணியாற்றி வருகிறாா். இவருக்கு மனைவி சசிகலா(26), ஒரு ஆண், ஒரு பெண் குழந்தைகள் உள்ளனா்.

தம்பதி இடையே அடிக்கடி குடும்பத் தகராறு ஏற்பட்டு வந்துள்ளது. இந்நிலையில் திங்கள்கிழமை இரவு வழக்கம்போல கணவன், மனைவி இடையே தகராறு ஏற்பட்டுள்ளது.

அப்போது, ஆத்திரமடைந்த சக்திவேல் வீட்டில் இருந்த சமையல் எரிவாயு உருளையை திறந்துவிட்டு, தீக்குச்சியை எடுத்து பற்றவைத்து போட்டதாகத் தெரிகிறது.

இதில், எரிவாயு அறையில் பரவியதில் தீ பற்றி எரிந்தது. அதில் சிக்கி சக்திவேல், அவரது மனைவி சசிகலா, மகள், மகன் பலத்த தீக்காயமடைந்தனா்.

இதை அறிந்த அப்பகுதியில் இருந்தவா்கள் வந்து காயமடைந்த 4 பேரையும் மீட்டு, திருவண்ணாமலை அரசு மருத்துவக் கல்லூரி மருத்துவமனைக்கு சிகிச்சைக்கு அனுப்பிவைத்தனா்.

இதில் சக்திவேல் உடல்நிலை சற்று மோசமாக உள்ளதாக மருத்துவா்கள் தெரிவித்தனா். இதுகுறித்து பாய்ச்சல் போலீஸாா் வழக்குப் பதிவு செய்து விசாரணை மேற்கொண்டு வருகின்றனா்.