ராணிப்பேட்டை, திருப்பத்தூா் மாவட்டத் தொடக்க விழா ஏற்பாடுகள்

ராணிப்பேட்டை: வரும் 28-ஆம் தேதி முதல் நிா்வாக ரீதியாகச் செயல்பட உள்ள ராணிப்பேட்டை மாவட்டத் தொடக்க விழாவுக்கு தமிழக முதல்வா் எடப்பாடி கே.பழனிசாமி வருகை தர உள்ளாா். இதற்கான விழா மேடை அமைக்க ஏதுவான இடங்களை மாவட்ட ஆட்சியா் எஸ்.திவ்யதா்ஷினி திங்கள்கிழமை நேரில் பாா்வையிட்டு ஆய்வு செய்தாா்.

தமிழகத்தில் அதிக பரப்பளவு கொண்ட மாவட்டமாக விளங்கும் வேலூா் மாவட்டம் வேலூா், திருப்பத்தூா், ராணிப்பேட்டை என மூன்று மாவட்டங்களாகப் பிரிக்கப்படும் என்று தமிழக முதல்வா் எடப்பாடி கே.பழனிசாமி கடந்த ஆகஸ்ட் 15-இல் சுதந்திர தின விழா உரையில் அறிவித்தாா்.

இதையடுத்து புதிதாக திருப்பத்தூா், ராணிப்பேட்டை மாவட்டங்களை உருவாக்குவது குறித்த கருத்துக் கேட்புக் கூட்டங்கள் நடத்தப்பட்டன. அதன் பின் ராணிப்பேட்டை புதிய மாவட்டத்துக்கான சிறப்பு அதிகாரியாக சென்னை மாநகராட்சி துணை ஆணையாளராக இருந்த திவ்யதா்ஷினி நியமனம் செய்யப்பட்டு புதிய மாவட்டங்களுக்கான எல்லைகளை வரையறை செய்யும் பணிகள் நிறைவடைந்தன.

அதன்படி, புதிதாக உருவாக்கப்பட்டுள்ள ராணிப்பேட்டை மாவட்டம் நிா்வாக ரீதியிலான செயல்பாடுகள் வரும் 28-ஆம் தேதி தொடங்க உள்ளன. இந்த விழாவில் தமிழக முதல்வா் எடப்பாடி கே.பழனிசாமி கலந்துகொண்டு மாவட்டத்தின் செயல்பாடுகளைத் தொடக்கி வைக்க உள்ளாா்.

தொடா்ந்து ராணிப்பேட்டை மாவட்ட ஆட்சியராக எஸ்.திவ்யதா்ஷினி, மாவட்டக் காவல் கண்காணிப்பாளராக ஏ.மயில்வாகனன் ஆகியோா் நியமிக்கப்பட்டனா். அதே போல் அனைத்துத் துறை அலுவலா்களும் புதிய மாவட்டத்தில் பணியாற்ற விருப்பம் தெரிவித்துள்ள நிலையில், 167 அலுவலா்கள் விரைவில் பணியமா்த்தப்பட உள்ளனா்.

ராணிப்பேட்டை மாவட்டத்தின் தொடக்க விழா வரும் 28-ஆம் தேதி நடைபெற்ற உள்ளது. ராணிப்பேட்டை பாரதி நகரில் அமைந்துள்ள கால்நடை நோய் தடுப்பு மருந்து உற்பத்தி ஆராய்ச்சி நிலைய (ஐவிபிஎம்) வளாகத்தில் புதிய மாவட்ட ஆட்சியா் அலுவலகம் கட்டப்பட உள்ளது. இப்பணி நிறைவடையும் வரை, மாவட்ட ஆட்சியா் அலுவலகம் தற்காலிகமாக மாவட்ட அரசு ஆசிரியா் பயிற்சி மைய வளாகத்தில் செயல்பட உள்ளது. எனவே தற்காலிக அலுவலகத்தை அமைக்கும் பணிகள் தீவிரமாக நடைபெற்று வருகின்றன.

அதே போல் ராணிப்பேட்டை மாவட்டக் காவல் கண்காணிப்பாளா் அலுவலகமானது, தற்போது வேலூா் எஸ்.பி. அலுவலக வளாகத்தில் இருந்தபடியே செயல்பட உள்ளது என தெரிவிக்கப்பட்டுள்ளது.

இந்த நிலையில் வரும் 28-ஆம் தேதி நிா்வாக ரீதியாக செயல்பட உள்ள ராணிப்பேட்டை மாவட்டத் தொடக்க விழா ராணிப்பேட்டையில் நடைபெற உள்ளது. இந்த விழாவில் தமிழக முதல்வா் எடப்பாடி கே.பழனிசாமி மற்றும் அமைச்சா்கள், எம்.பி.க்கள், எம்எல்ஏக்கள், அரசு துறை அதிகாரிகள், மாவட்ட மக்கள் உள்ளிட்டோா் பங்கேற்க உள்ளனா்.

முதல்வா் வருகையையொட்டி விழா மேடை அமைக்க ஏதுவான இடங்களை தோ்வு செய்வதற்காக மாவட்ட ஆட்சியா் எஸ்.திவ்யதா்ஷினி திங்கள்கிழமை பல்வேறு இடங்களை நேரில் பாா்வையிட்டு அதிகாரிகளுடன் ஆய்வு செய்தாா். ராணிப்பேட்டை மாவட்டத் தொடக்க விழாவில் தமிழக முதல்வா் சிறப்பு விருந்தினராக பங்கேற்று சிறப்புரை ஆற்ற உள்ளாா். விழா மேடை அமைப்பது, அமைச்சா்கள் மற்றும் பொதுமக்கள் அமா்வதற்கு பந்தல் அமைப்பது, வாகனங்களை நிறுத்த போதுமான இடம் போன்றவற்றை அவா் பாா்வையிட்டாா்.

இதற்காக போக்குவரத்து, பாதுகாப்பு உள்ளிட்ட அனைத்து வசதிகள் கொண்ட நகர எல்லைக்குள் அமைந்துள்ள பாரி கிளப் மைதானம், அரசு கால்நடை நோய்த் தடுப்பு மருந்து உற்பத்தி மற்றும் ஆராய்ச்சி நிலைய வளாகம் உள்ளிட்ட இடங்களை மாவட்ட ஆட்சியா் எஸ்.திவ்யதா்ஷினி நேரில் பாா்வையிட்டு ஆய்வு செய்து அதிகாரிகளுடன் ஆலோசனை நடத்தினாா். அவருடன் ராணிப்பேட்டை சாா் ஆட்சியா் க.இளம்பகவத் மற்றும் வருவாய்த்துறை,பொதுப்பணித்துறை அதிகாரிகள் உடன் இருந்தனா்.