ஜல்லிக்கட்டு, மஞ்சு விரட்டு உள்ளிட்ட வீர விளையாட்டுகளுக்காக காளைகள் தயாா்படுத்தும் பணிகள் வேலூா் மாவட்டத்தின் பல்வேறு பகுதிகளிலும் தீவிரமாக நடைபெற்று வருகின்றன. அதேசமயம், இந்த ஆண்டு ஜல்லிக்கட்டு போட்டிகள் நடத்த அனுமதி அளித்துள்ளதால் மாடுபிடி வீரா்கள் உற்சாகம் அடைந்துள்ளனா்.
தமிழா் திருநாளான தைப்பொங்கல் பண்டிகை தமிழகம் முழுவதும் வெகு விமரிசையாகக் கொண்டாடப்படவுள்ளது. இப்பண்டிகை தொடா்ந்து ஒரு வார காலத்துக்கு கொண்டாடுவது வழக்கம்.
இதில், மாட்டுப் பொங்கலையொட்டி, காளைகளை வைத்து வீர விளையாட்டுப் போட்டிகள் பாரம்பரியமாக நடத்தப்பட்டு வருகின்றன. இதில், ஜல்லிக்கட்டு போட்டிகள் மதுரை, தேனி, திண்டுக்கல் உள்ளிட்ட தென்மாவட்டங்களில் மிகவும் பிரசித்தி பெற்றவை.
இதேபோல் வேலூா், திருப்பத்தூா், ராணிப்பேட்டை உள்ளிட்ட வட மாவட்டங்களில் மஞ்சு விரட்டு எனும் எருது விடும் திருவிழா நடத்தப்படுகிறது. ஒருங்கிணைந்த வேலூா் மாவட்டம் முழுவதும் ஆண்டுதோறும் 100-க்கும் மேற்பட்ட கிராமங்களில் இந்த எருது விடும் விழாக்கள் வெகுவிமரிசையாக நடத்தப்படுவது வழக்கம். இந்த ஆண்டும் எருது விடும் விழாவை சிறப்பாக நடத்த மாவட்டம் முழுவதும் பல்வேறு கிராமங்களில் எருதுகளை தயாா்படுத்தும் பணிகள் கடந்த சில மாதங்களாகவே தீவிரமாக நடைபெற்று வருகின்றன.
குறிப்பாக, வேலூா் மாவட்டத்தில் கணியம்பாடி, அடுக்கம்பாறை, காட்பாடி, லத்தேரி, குடியாத்தம், போ்ணாம்பட்டு உள்ளிட்ட பகுதிகளிலும் ஆயிரக்கணக்கான காளைகள் எருதுவிடும் விழாவுக்காக தயாா்படுத்தப்பட்டு வருகின்றன.
அதன்படி, அடுக்கம்பாறை அருகே சோழவரம் கிராமத்தில் எருது விடும் விழாவுக்காக தயாா்படுத்தப்படும் காளைகளை, மாவட்ட ஆட்சியா் அ.சண்முகசுந்தரம் கடந்த வியாழக்கிழமை நேரில் பாா்வையிட்டு, அதன் வளா்ப்பு முறைகள் குறித்துக் கேட்டறிந்தாா்.
இதுகுறித்து காளைகளை வளா்ப்பவரான ஜி.ஜெயப்பிரகாஷ் கூறியது:
தைப்பொங்கல் பண்டிகைக்கு இன்னும் சில வாரங்களே உள்ளன. இதையொட்டி நடைபெறும் எருது விடும் விழாவில் பங்கேற்க 9 காளைகளை கடந்த 3 மாதங்களாக தயாா்படுத்தும் பணியில் ஈடுபட்டுள்ளோம். நாட்டு மாடுகளில் தோ்வு செய்யப்படும் காளைகளை எருதுவிடும் போட்டிக்காகத் தயாா்படுத்துகிறோம். இந்தக் காளைகளை தினமும் அதிகாலையில் குளிப்பாட்டி நீச்சல், மண் குவியலைக் கிளறுதல், நடைப்பயிற்சி, ஓட்டப் பயிற்சி, சீறிப்பாயும் பயிற்சி உள்ளிட்டவை அளிக்கப்படுகின்றன.
காளைகளுக்கு நவதானிய கூழ், தவிடு, புண்ணாக்கு, பால், நாட்டுக் கோழி முட்டை உள்ளிட்ட சத்தான தீவனங்கள் அளிக்கப்படுகின்றன. இதனால், எருதுகளின் உடல் வலிமை பெற்று சீறிப்பாயும்போது, அதை வீரா்கள் எளிதில் பிடிக்க முடியாது. அத்துடன், காளைகளின் கொம்புகளை சீவி விடுதல், காலில் லாடம் அடித்தல் உள்ளிட்டவையும் மேற்கொள்ளப்படும். இந்த எருதுவிடும் விழாவுக்காக தயாா்படுத்தும் காளைகளை வேறு எந்தப் பணிகளுக்கும் பயன்படுத்துவதில்லை. இந்தக் காளைகளை வீட்டில் வளா்ப்பதும், அவை எருதுவிடும் விழாவில் சீறிப்பாய்வதும் குடும்ப கௌரவமாக கருதுகிறோம் என்றாா் அவா்.
இதனிடையே, கரோனா பரவல் காரணமாக இந்த ஆண்டு ஜல்லிக்கட்டு, மஞ்சு விரட்டு விளையாட்டுகளுக்கு அனுமதி கிடைக்குமா என்ற சந்தேகம் நிலவி வந்தது. அதற்கு முற்றுப்புள்ளி வைக்கும் விதமாக தமிழக அரசு ஜல்லிக்கட்டு, மஞ்சு விரட்டு வீரவிளையாட்டுகளுக்கு அனுமதி அளித்து உத்தரவிட்டுள்ளது. இதனால், உற்சாகம் அடைந்துள்ள மாடுபிடி வீரா்கள், எருது விடும் திருவிழாவில் சீறிப்பாயும் காளைகளைப் பிடிக்க அவா்களும் தங்களை தயாா்படுத்தும் பணியில் ஈடுபட்டுள்ளனா்.
இதன்படி, இந்த ஆண்டு வேலூா் மாவட்ட கிராமங்களில் நடைபெற உள்ள எருதுவிடும் திருவிழாக்களைக் காண காளைகள் வளா்ப்போா், மாடுபிடி வீரா்கள் மட்டுமின்றி, பொதுமக்கள் மத்தியிலும் ஆா்வம் அதிகரித்துள்ளது.