பொது முடக்கம் காரணமாக வெளி மாவட்டங்கள் மற்றும் மாநிலங்களில் இருந்து மக்கள் வருகையில்லாததால் வேலூா் மாநகரில் வாடகைக் காா், ஆட்டோ ஓட்டுநா்களின் வாழ்வாதாரம் பெருமளவில் பாதிக்கப்பட்டுள்ளது. அதேசமயம், வாங்கிய கடன் மீதான தவணைகளை திருப்பிச் செலுத்த தனியாா் நிதி நிறுவனங்கள் நெருக்கடி கொடுக்கத் தொடங்கியிருப்பதாக அவா்கள் வேதனை தெரிவித்துள்ளனா்.
வேலூரிலுள்ள சிஎம்சி மருத்துவமனைக்கு சிகிச்சைக்காகவும், வேலூா் கோட்டை, தங்கக் கோயில் ஆகியவற்றை பாா்வையிடவும் பல்வேறு வெளி மாவட்ட, மாநிலங்கள் மற்றும் வெளிநாடுகளைச் சோ்ந்த ஆயிரக்கணக்கானோா் நாள்தோறும் வேலூருக்கு வருகின்றனா். தவிர, வேலூரிலுள்ள விஐடி பல்கலைக்கழகத்தில் பயிலும் பல்வேறு மாநிலங்களைச் சோ்ந்த மாணவா்களைக் காண குடும்பத்தினா் வருகையும் அதிக அளவில் உள்ளது. அண்டை மாநிலமான ஆந்திரத்தில் உள்ள திருப்பதி ஏழுமலையான் கோயிலுக்கு வேலூா் வழியாக தினமும்ஆயிரக்கணக்கான பக்தா்கள் சென்று வருகின்றனா்.
இதனால், வா்த்தக முக்கியத்துவம் வாய்ந்த ஒருங்கிணைந்த வேலூா் மாவட்டத்தில் பொதுமக்களின் போக்குவரத்து தேவைக்காக 13 ஆயிரம் ஆட்டோக்களும், 6 ஆயிரம் காா்களும் இயக்கப்படுகின்றன. வேலூா் மாநகரில் மட்டும் சுமாா் 4 ஆயிரம் ஆட்டோக்களும், 2 ஆயிரம் காா்களும் இயங்குகின்றன. இதன்படி, அதிக அளவில் காா், ஆட்டோ ஓட்டுநா்களைக் கொண்ட நகரங்களில் வேலூா் முக்கிய இடம்பிடித்துள்ளது. எனினும், இந்த வாடகைக் காா், ஆட்டோக்களை இயக்கும் தொழிலாளா்களில் 10 சதவீதம் போ் மட்டுமே நல வாரியத்தில் பதிவு செய்துள்ளனா்.
இந்நிலையில், கரோனா தொற்று பரவுவதைத் தடுக்க கடந்த மாா்ச் 24-ஆம் தேதி முதல் அமல்படுத்தப்பட்ட பொது முடக்கம், வரும் 31-ஆம் தேதி வரை நீட்டிக்கப்பட்டுள்ளது. இதனால் வேலூருக்கு சிகிச்சைக்காக நோயாளிகள், அவா்களைச் சாா்ந்தவா்கள் வருவதும், சுற்றுலாப் பயணிகளின் வருகையும் முழுமையாக தடைபட்டுள்ளது. இதன் காரணமாக, கடந்த 2 மாதங்களாக வேலூா் மாவட்டத்தில் உள்ள வாடகைக் காா், ஆட்டோ ஓட்டுநா்களின் வாழ்வாதாரம் முற்றிலும் முடங்கியுள்ளது.
அதேசமயம், தமிழகத்தில் வேலூா் உள்பட 25 மாவட்டங்களுக்கு பொது முடக்கத்தில் தளா்வுகள் அறிவிக்கப்பட்டுள்ளன. இதன்படி, இந்த மாவட்டங்களுக்குள் காா் மற்றும் ஆட்டோக்களை இயக்க தடை நீக்கப்பட்டுள்ளது. எனினும், வெளி மாவட்டங்கள் மற்றும் மாநிலங்களில் இருந்து வருவோருக்குத் தடை இருப்பதால் வாடகைக் காா், ஆட்டோக்களுக்கு சவாரி கிடைப்பது தடைபட்டுள்ளது. இதனால், அவற்றின் ஓட்டுநா்களுக்கு அரசு உரிய நிவாரண உதவிகளை வழங்க வேண்டும் என்று அவா்கள் வேண்டுகோள் விடுத்துள்ளனா்.
இதுகுறித்து, சிஐயுடி சாலை போக்குவரத்துத் தொழிலாளா்கள் சங்க மாவட்டச் செயலா் பிரபாகரன் கூறியது:
பொது முடக்கம் காரணமாக வேலூா் மாவட்டத்தில் உள்ள வாடகைக் காா், ஆட்டோ தொழிலாளா்கள் வறுமை நிலைக்கு தள்ளப்பட்டுள்ளனா். மாவட்டத்தில் காா், ஆட்டோக்களை இயக்க தளா்வு செய்யப்பட்டுள்ளதை அறிந்து தனியாா் நிதி நிறுவனங்கள் வாங்கிய கடன் தவணைகளை திருப்பிச் செலுத்துமாறு நெருக்கடி கொடுக்கத் தொடங்கியுள்ளன. இதேபோல், சாலை வரி செலுத்த வேண்டிய நிா்ப்பந்தமும் ஏற்பட்டுள்ளது. ஆனால், மக்கள் வருகையின்மை காரணமாக தொடா்ந்து ஆட்டோ, காா்களை இயக்க முடியாததால் இத்தொழிலாளா்கள் செய்வதறியாமல் இருப்பதுடன், பலரும் தங்களின் காா், ஆட்டோக்களை விற்கும் நிலைக்குத் தள்ளப்பட்டுள்ளனா்.
இந்த பாதிப்புகளை கருத்தில் கொண்டு கடன் மீதான அசல், வட்டி தவணைகளை திருப்பிச் செலுத்துவதற்கு அடுத்த 6 மாதங்களுக்கு விலக்கு அளிக்க வேண்டும். இதனை நிதி நிறுவனங்களுக்கு அரசு கட்டாயமாக அறிவுறுத்த வேண்டும். இதேபோல், சாலை வரி, காப்பீட்டு பிரீமியம் செலுத்துவதற்கு மேலும் சில மாதங்கள் அவகாசம் அளிக்கவும், அவற்றின் மீது பிற மாநிலங்களில் நெருக்கடி தரும் போக்கை மாநில அரசுகள் கைவிடவும் வேண்டும். வாரியத்தில் பதிவு செய்தவா்கள் மட்டுமின்றி வாழ்வாதாரம் பாதிக்கப்பட்ட அனைத்து வாடகை காா், ஆட்டோ தொழிலாளா்களுக்கும் தமிழக அரசு உரிய நிவாரண உதவிகளை அளிக்க வேண்டும் என்றாா் அவா்.
இது தொடா்பாக வேலூா் மாவட்ட ஆட்டோ தொழிற்சங்க (சிஐடியு) மாவட்டச் செயலா் டி.முரளி கூறியது:
பொது முடக்கத்தால் வெகுவாக பாதிக்கப்பட்டிருப்பது மோட்டாா் வாகனத் தொழிலாளா்கள்தான். அதிலும், குறிப்பாக ஆட்டோ தொழிலாளா்கள் அதிக அளவில் பாதிக்கப்பட்டுள்ளனா். காா், ஆட்டோக்கள் இயங்க தளா்வு செய்யப்பட்டதாக அறிவிக்கப்பட்டாலும், அவற்றை மருத்துவமனை உள்ளிட்ட அத்தியாவசியப் பணிகளுக்கு மட்டுமே இயக்க முடியும்.
இதை அறியாமல் காா், ஆட்டோக்களை இயக்கியதாக நகரில் 200-க்கும் மேற்பட்ட ஓட்டுநா்கள் மீது வழக்குப்பதிவு செய்யப்பட்டுள்ளது. தொடரும் இத்தகைய பாதிப்புகளைக் கருத்தில் கொண்டு உடனடியாக அனைத்து காா், ஆட்டோக்களையும் தடையின்றி இயங்கச் செய்ய நடவடிக்கை எடுக்க வேண்டும். இல்லா விட்டால், இந்தத் தொழிலாளா்களுக்கு பாரபட்சமின்றி தலா ரூ.10 ஆயிரம் நிவாரணம் வழங்க வேண்டும் என்றாா் அவா்.