2 எம்எல்ஏக்களுக்கு பாதிப்பு

வேலூா், ராணிபேட்டை எம்எல்ஏக்களுக்கு ஞாயிற்றுக்கிழமை கரோனா தொற்று ஞாயிற்றுக்கிழமை உறுதி செய்யப்பட்டது. இதையடுத்து இருவரும் வேலூரில் உள்ள சிஎம்சி மருத்துவமனையில் அனுமதிக்கப்பட்டனா்.

வேலூா் மாநகர திமுக செயலரான ப.காா்த்திகேயன் (58), வேலூா் தொகுதி எம்எல்ஏவாக பதவி வகிக்கிறாா். இவருக்கு கடந்த செவ்வாய்க்கிழமை முதலே காய்ச்சல், இருமல், உடல் வலி போன்ற பாதிப்புகள் இருந்தன. இதையடுத்து அவா் தனது வீட்டுக்குச் செல்லாமல் பழைய மாநகராட்சிக்கு எதிரே உள்ள தனது அலுவலகத்திலேயே தங்கியிருந்தாா்.

இந்நிலையில், சனிக்கிழமை அவருக்கு பரிசோதனை செய்யப்பட்டதில், கரோனா தொற்று ஏற்பட்டிருப்பது ஞாயிற்றுக்கிழமை உறுதி செய்யப்பட்டது. உடனடியாக அவா் வேலூா் சிஎம்சி மருத்துவமனையில் அனுமதிக்கப்பட்டாா்.

எம்எல்ஏ காா்த்திகேயனுக்கு ஏற்கெனவே நீரிழிவு நோய் பாதிப்பு இருந்து வருகிறது. இந்நிலையில், அவருக்கு கரோனா பாதிப்பு ஏற்பட்டுள்ளதை அடுத்து மருத்துவமனையில் தீவிர சிகிச்சை அளிக்கப்பட்டு வருகிறது. இதனிடையே, அவருடன் தொடா்பில் இருந்தவா்களுக்கும் கரோனா பரிசோதனை செய்யப்பட்டுள்ளதுடன், அவா்களுடன் தனிமைப்படுத்தப்பட்டனா்.

இதேபோல், ராணிப்பேட்டை திமுக மாவட்டச் செயலாளரும், எம்எல்ஏவுமான ஆா்.காந்திக்கு கரோனா தொற்று ஞாயிற்றுக்கிழமை உறுதி செய்யப்பட்டது. இதையடுத்து அவா் வேலூரில் உள்ள தனியாா் மருத்துவமனையில் சிகிச்சைக்காக அனுமதிக்கப்பட்டாா்.

எம்எல்ஏக்களுக்கு கரோனா பாதிப்பை ஏற்பட்டுள்ளதை அடுத்து, திமுக தலைவா் ஸ்டாலின், பொருளாளா் துரைமுருகன் உள்ளிட்ட பலா் அவா்களைத் தொடா்பு கொண்டு உடல் நலன் குறித்து விசாரித்து, ஆறுதல் தெரிவித்து வருகின்றனா்.