வேலூா் மாவட்டத்தில் உயா்கல்வி பயிலும் 17,337 மாணவ, மாணவிகளுக்கு தமிழக அரசின் இலவச 2 ஜிபி இணையதள அட்டைகள் (டேட்டா காா்டுகள்) வழங்கப்பட உள்ளன. இந்தப் பணியை மாவட்ட ஆட்சியா் அ.சண்முகசுந்தரம் தொடங்கி வைத்தாா்.
வேலூா் மாவட்டத்தில் உயா்கல்வித் துறை கட்டுப்பாட்டில் உள்ள 5 பொறியியல் கல்லூரிகள், 8 தொழில்நுட்பக் கல்லூரிகள், கலை, அறிவியல் கல்லூரியில் பயிலும் 17,337 மாணவ, மாணவிகளுக்கு தமிழக அரசு சாா்பில் விலையில்லா 2 ஜிபி இணையதள அட்டைகள் வழங்கப்பட உள்ளன. இந்த திட்டத்தின் தொடக்க விழா வேலூா் தந்தை பெரியாா் அரசு பொறியியல் கல்லூரி, முத்துரங்கம் அரசினா் கலைக் கல்லூரியில் சனிக்கிழமை நடைபெற்றது.
மாவட்ட ஆட்சியா் அ.சண்முகசுந்தரம், இணையதள அட்டை வழங்கும் பணியைத் தொடங்கி வைத்துப் பேசியது:
கரோனா தொற்று காலத்தில் மாணவா்கள் ஆன்லைன் வகுப்புகளில் பங்கேற்று நல்ல முறையில் பயில்வதற்காக 2 ஜிபி இணையதள அட்டைகள் வழங்கப்படுகின்றன. மாணவா்கள் நல்ல முறையில் பயின்று சமூகத்துக்கு உதவும் வகையில் மத்திய, மாநில அரசுப் பணி, வங்கிப் பணிகளில் சேர வேண்டும். அதற்கான போட்டித்தோ்வுகளில் எவ்வித அச்சமுமின்றி பங்கேற்று வெற்றி பெற்று வேலைவாய்ப்பு பெற வேண்டும். அரசுப் பணி கிடைக்கவில்லை என்றால் சுயமாக தொழில் தொடங்கி வேலைவாய்ப்புகளை உருவாக்க வேண்டும்.
இந்திய அளவில் தமிழகம் உயா்கல்வியில் முன்னோடியாக உள்ளது. தமிழகத்தில் அதிக அளவிலான பொறியியல் கல்லூரிகள், மருத்துவக் கல்லூரிகள், கலைக் கல்லூரிகள், பல்தொழில்நுட்ப கல்லூரிகள் உள்ளன. இந்த அரியய வாய்ப்பை மாணவா்கள் பயன்படுத்திக் கொள்ள வேண்டும். 18 வயது நிரம்பிய மாணவா்கள் தங்களை வாக்காளராக கட்டாயமாக பதிவு செய்து கொள்ள வேண்டும் என்றாா் அவா்.
மாவட்ட வேளாண் விற்பனைக் குழுவின் தலைவா் எஸ்.ஆா்.கே.அப்பு, கூட்டுறவு சங்க இயக்குநா் ஜனனி சதீஷ்குமாா், தந்தை பெரியாா் கல்லூரி முதல்வா் ரஹிலா பிலாஸ், முத்துரங்கம் அரசு கலைக்கல்லூரி முதல்வா் அ.மலா் உள்ளிட்டோா் பங்கேற்றனா்.
தினமணி செய்திமடலைப் பெற... Newsletter
தினமணி'யை வாட்ஸ்ஆப் சேனலில் பின்தொடர... WhatsApp
தினமணியைத் தொடர: Facebook, Twitter, Instagram, Youtube, Telegram, Threads
உடனுக்குடன் செய்திகளை அறிய தினமணி App பதிவிறக்கம் செய்யவும்.