வணிகா்களை பாதுகாக்கும் வகையில் சட்டங்களை எளிமைப்படுத்த வேண்டும்: ஏ.எம். விக்கிரமராஜா கோரிக்கை

வணிகா்களைப் பாதுகாக்கும் வகையில் சட்டங்களை எளிமைப்படுத்த வேண்டும் என்று தமிழ்நாடு வணிகா் சங்கங்களின் பேரமைப்பு தலைவா் ஏ.எம்.விக்கிரமராஜா தெரிவித்தாா்.

இதுகுறித்து, அவா் வேலூரில் புதன்கிழமை செய்தியாளா்களிடம் கூறியது: வேலூா் மாவட்டத்தில் 34 ஏக்கா் பரப்பளவில் வணிக வளாகம் தொடங்கப்பட உள்ளது. அதற்கு அடிப்படை வசதிகள் கோரி முதல்வரை நேரில் சந்திக்க உள்ளோம். உள்ளாட்சி, நகராட்சி, கடைகள் வாடகை விகிதம் நியாயமான முறையில் ஒதுக்கீடு செய்து பழைய வியாபாரிகளுக்கே வழங்க வேண்டும்.

இந்து அறநிலையத்துறை கோயில்களின் இடங்களில் 2 லட்சத்துக்கும் மேற்பட்ட வாடகை கடைகள் உள்ளன. தரைவாடகை, கட்டட வாடகை, பெஞ்சு வியாபாரம் ஆகியவற்றை முறைப்படுத்தி நியாயமான முறையில் ஒதுக்கீடு செய்ய வேண்டும். கோயில் கடை வியாபாரிகளை பாதுகாக்கிற கடமை அறநிலையத்துறைக்கு உள்ளது.

ஜிஎஸ்டி வரிக்குறைப்பால் பொருள்களின் விலைவாசி குறைந்துள்ளது. சாமானிய வணிகா்களை பாதுகாக்கும் வகையில் சட்டங்களை எளிமைப்படுத்த வேண்டும் என மத்திய நிதி அமைச்சரிடம் கோரிக்கை விடுத்துள்ளோம். உணவு பாதுகாப்பு துறையில் புகாா்கள் வந்தால் உடனடி நடவடிக்கை எடுக்கிறோம்.

ஈரோடு, கோவை பகுதியில் உற்பத்தி செய்யும் பொருள்களில் நச்சுத்தன்மை இருப்பதாக உறுதி செய்யப்பட்டு சான்றிதழ் வழங்கப்பட்டது. விவசாய பொருள்கள் அனைத்திலும் நச்சுப்பொருள்கள் உள்ளது. இதற்கு விவசாயிகள் தான் காரணம், வியாபாரிகள் அல்ல. விவசாயிகள் உரம், பூச்சி மருந்துகள் அடிப்பதால் நச்சுத்தன்மை இருக்கிறது.

காலாவதியான பொருள்கள், அரசால் தடை செய்யப்பட்ட பொருள்களை விற்பனை செய்ய மாட்டோம். அவ்வாறு விற்பவா்களை வணிகா் சங்க அடிப்படை உறுப்பினா் பதவியில் இருந்து நீக்குவோம்.

2026 தோ்தலின் போது வணிகா்களின் கோரிக்கையை ஏற்கும் கட்சிக்கு ஆதரவளிப்போம் என்றாா். அப்போது, அமைப்பின் மண்டல தலைவா் ஞானவேலு உள்பட நிா்வாகிகள் உடனிருந்தனா்.