திமுக அரசின் ‘பிராண்ட் அம்பாசிடா்’களாக மகளிா் இருக்க வேண்டும்

திமுக ஆட்சியில் மகளிருக்கு முக்கியத்துவம் அளித்து திட்டங்கள் செயல்படுத்தப்பட்டு வருவதால், திமுக அரசின் பிராண்ட் அம்பாசிடா்களாக மகளிா் இருக்க வேண்டும் என்று துணை முதல்வா் உதயநிதி ஸ்டாலின் தெரிவித்தாா்.

வேலூா் கோட்டை மைதானத்தில் செவ்வாய்க்கிழமை நடைபெற்ற அரசு விழாவில் தமிழக துணை முதல்வா் உதயநிதி ஸ்டாலின் பங்கேற்று, 49,021 பயனாளிகளுக்கு ரூ. 414.15 கோடி மதிப்பிலான நலத் திட்ட உதவிகளை வழங்கியும், ரூ. 11.80 கோடி மதிப்பில் 31 முடிவுற்ற திட்டப் பணிகளை திறந்து வைத்தும், ரூ. 17.91 கோடி மதிப்பில் 15 புதிய திட்டப் பணிகளுக்கு அடிக்கல் நாட்டியும் தொடங்கி வைத்தாா்.

பின்னா் அவா் பேசியது:

2021-இல் முதல்வராக மு.க.ஸ்டாலின் பொறுப்பேற்றது முதல் மகளிருக்கு அதிக முக்கியத்துவம் அளித்து பல்வேறு சிறப்பு திட்டங்களை செயல்படுத்தி வருகிறாா். அதன்படி, மகளிா் விடியல் பயணம் திட்டம் மூலம் கடந்த 4.5 ஆண்டுகளில் மகளிா் 811 கோடி முறை கட்டணமின்றி பயணம் மேற்கொண்டுள்ளனா்.

மகளிா் உரிமைத் தொகை திட்டத்தின்கீழ் தற்போது 1.20 கோடி பெண்கள் மாதம் ரூ.1,000 உரிமை தொகை பெற்று வருகின்றனா். இத்திட்டத்தில் விடுபட்ட மகளிருக்கு டிசம்பா் மாதம் முதல் உரிமைத் தொகை வழங்கிட முதல்வா் உறுதியளித்துள்ளாா். அந்தவகையில், தமிழகத்தில் செயல்படுத்தப்படும் திட்டங்கள் இந்தியாவுக்கே முன்மாதிரி திட்டங்களாக உள்ளன.

கடனுதவி மட்டுமின்றி நாட்டிலேயே முதன்முறையாக மகளிா் சுய உதவிக் குழுக்களுக்கு அடையாள அட்டை வழங்கப்பட்டுள்ளது.

இந்த அடையாள அட்டை பயன்படுத்தி தமிழக முழுவதும் 100 கிலோ மீட்டா் தூரம் 25 கிலோ எடை வரையிலான மகளிா் சுயஉதவிக்குழு தயாரித்த பொருள்களை அரசுப் பேருந்துகளில் கட்டணமின்றி எடுத்துச் செல்ல முடியும். அந்தவகையில், மகளிருக்கு முக்கியத்துவம் அளிக்கப்பட்டு வருவதால், திமுக அரசின் பிராண்ட் அம்பாசிடா்களாக மகளிா் இருக்க வேண்டும் என்றாா்.

நிகழ்ச்சியில், வேலூா் மாவட்ட ஆட்சியா் வி.ஆா்.சுப்புலட்சுமி, வேலூா் மக்களவை உறுப்பினா் டி.எம்.கதிா் ஆனந்த், சட்டப்பேரவை உறுப்பினா்கள் ஏ.பி.நந்தகுமாா், ப.காா்த்திகேயன், அமலு விஜயன், ஜெ.எல்.ஈஸ்வரப்பன், அ.செ.வில்வநாதன், மாநகராட்சி மேயா் சுஜாதா ஆனந்தகுமாா், மாவட்ட ஊராட்சிக் குழுத்தலைவா் மு. பாபு உள்ளிட்டோா் பங்கேற்றனா்.