மாணவிக்கு பாலியல் சீண்டல்: ஆசிரியருக்கு 5 ஆண்டுகள் சிறை

பள்ளி மாணவிக்கு பாலியல் தொல்லை கொடுத்து வந்த டியூசன் ஆசிரியருக்கு 5 ஆண்டுகள் சிறை தண்டனை விதித்து வேலூா் போக்ஸோ சிறப்பு நீதிமன்றம் தீா்ப்பளித்துள்ளது.

வேலூரை அடுத்த தொரப்பாடியைச் சோ்ந்தவா் மீா் பாகா் அலி (54). இவா் அதே பகுதியில் நடத்தி வந்த டியூசன் சென்டரில் வேலூா் உள்பட பல்வேறு பகுதிகளைச் சோ்ந்த மாணவ, மாணவிகள் படித்து வந்தனா். அந்த டியூசன் சென்டரில் வேலூரைச் சோ்ந்த 7-ஆம் வகுப்பு படித்த 13 வயது சிறுமியும் படித்தாா். அப்போது, அந்த சிறுமியை மீா் பாகா் அலி தவறாக தொடுவதும், சில்மிஷம் செய்வதுமாக இருந்துள்ளாா்.

இதுகுறித்து அந்த சிறுமி தனது தாயாரிடம் தெரிவித்துள்ளாா். இதையடுத்து, டியூசன் மாஸ்டா் மீது சிறுமியின் தாயாா் வேலூா் அனைத்து மகளிா் காவல் நிலையத்தில் புகாா் அளித்தாா்.

அதன்பேரில், போலீஸாா் வழக்குப்பதிவு செய்து மீா் பாகா் அலியை கைது செய்தனா். இந்த வழக்கு விசாரணை வேலூா் ஒருங்கிணைந்த நீதிமன்ற வளாகத்தில் உள்ள போக்ஸோ சிறப்பு நீதிமன்றத்தில் நடைபெற்று வந்தது. இதில், மீா் பாகா் அலி மீதான குற்றச்சாட்டுகள் நிரூபிக்கப்பட்டதை அடுத்து அவருக்கு 5 ஆண்டுகள் சிறை தண்டனையும், ரூ.20,000 அபராதமும், அபராதத்தை செலுத்த தவறினால் மேலும் 3 மாதம் சிறை தண்டனையும் விதித்து நீதிபதி ராதாகிருஷ்ணன் தீா்ப்பளித்தாா்.