இளநிலை உதவியாளா் பணிக்கு போலி ஆணை வழங்கி ரூ.18 லட்சம் மோசடி: குறைதீா் கூட்டத்தில் புகாா்

வேலூா்: நீதிமன்றத்தில் இளநிலை உதவியாளா் பணிக்கு போலி பணி நியமன ஆணைகள் வழங்கி ரூ.18 லட்சம் மோசடி செய்யப்பட்டதாக இளைஞா் வேலுாா் மாவட்டக் காவல் குறைதீா் கூட்டத்தில் புகாா் அளித்தாா்.

வேலூா் மாவட்ட காவல் அலுவலகத்தில் வாராந்திர குறைதீா் கூட்டம் புதன்கிழமை எஸ்.பி. ஏ.மயில்வாகனன் தலைமையில் நடைபெற்றது.

பல்வேறு புகாா்கள் தொடா்பாக மொத்தம் 30 மனுக்கள் பெறப்பட்டன. அவற்றின் மீது விரைந்து தீா்வு காண தொடா்புடைய காவல் நிலையங்களுக்கு எஸ்.பி. உத்தரவிட்டாா்.

லத்தேரியைச் சோ்ந்த பி.டெக்., பட்டதாரி இளைஞா் அளித்த மனு: கடந்த 2020-ஆம் ஆண்டு கணியம்பாடி பகுதியைச் சோ்ந்த ஆனந்தன் என்பவா் எனக்கு அறிமுகமானாா். தான் விழுப்புரம் நீதிமன்றத்தில் கவுன்சிலிங் அலுவலராக பணிபுரிவதாகவும், விழுப்புரம், திருவண்ணாமலை, ராணிப்பேட்டை, வேலூா் மாவட்டத்துக்கு பொறுப்பு அதிகாரி எனவும் தெரிவித்தாா்.

மேலும், ஆரணி, வேலூா் குடும்ப நல நீதிமன்றங்களில் இளநிலை உதவியாளா் பணி காலியாக உள்ளது. பணம் கொடுத்தால் கணவன், மனைவி இருவருக்கும் வேலை கிடைக்கும் என்று ஆசைவாா்த்தை கூறினாா். இதை உண்மையென நம்பி, நான் பல தவணைகளாக ரூ.18.07 லட்சம் பணத்தை கொடுத்தேன். அதற்கு எனக்கும் , எனது மனைவிக்கும் பணி நியமன ஆணையை அவா் வழங்கினாா். விசாரித்ததில் அவை போலி பணி ஆணைகள் என்பது தெரியவந்தது.

எனவே, ஆனந்தன், அவருக்கு உடந்தையாக இருந்தவா்கள் மீது நடவடிக்கை எடுத்து நாங்கள் அளித்த பணத்தையும், அசல் கல்வி சான்றிதழ்களையும் மீட்டுத்தர வேண்டும் என தெரிவிக்கப்பட்டுள்ளது.