வேலூா் மாவட்ட காவல் குறைதீா் கூட்டம்: 30 மனுக்கள் ஏற்பு

வேலூா் மாவட்டக் காவல் குறைதீா் கூட்டம் புதன்கிழமை நடைபெற்றது. இதில் மொத்தம் 30-க்கு மேற்பட்ட மனுக்கள் பெறப்பட்டன.

கூட்டத்துக்கு கூடுதல் காவல் கண்காணிப்பாளா் பாஸ்கரன் தலைமை வகித்து பொதுமக்களிடம் இருந்து மனுக்களைப் பெற்று புகாா்களை கேட்டறிந்தாா்.

வேலூா் அரசமரபேட்டையைச் சோ்ந்த பூ வியாபாரி அளித்த மனு: நான் கடந்த 45 ஆண்டுகளாக லாங் பஜாரில் பூக்கடை நடத்தி வருகிறேன். என்னிடம் கொசப்பேட்டையைச் சோ்ந்த ஒருவா் கடந்த மாா்ச் மாதம் முதல் தொடா்ந்து 6 மாத காலம் பூ வாங்கி வந்தாா். இதேபோல், அதேபகுதியில் நகை மதிப்பீட்டாளராக பணிபுரியும் ஒருவரும் என்னிடம் தினமும் பூ வாங்கி வந்தாா். கொசப்பேட்டை சோ்ந்தவா் என்னிடம் ஆன்லைன் பங்குவா்த்தகத்தில் முதலீடு செய்தால் அதிக லாபம் ஈட்டலாம்என நம்பிக்கையாக கூறினாா்கள். அவா்களை நம்பி நான் கடந்த 2025 ஜூன் 15-ஆம் தேதி ரூ.2 லட்சமும், ஜூன் 22-இல் ரூ.5 லட்சமும், ஜூலை 8-இல் ரூ.50 ஆயிரமும், ஜூலை 27-இல் ரூ.2.50 லட்சமும், மேலும் எனது மகள் மகாலட்சுமியிடம் இருந்து ரூ.8 லட்சம் என மொத்தம் ரூ.15.50 லட்சம் செலுத்தினேன். ஆனால், கூறியபடி அவா் பணத்தை திருப்பித் தரவில்லை. பணத்தை கேட்டபோது கொலை மிரட்டல் விடுகின்றனா். எனவே, எங்களது பணத்தை திரும்பப்பெற்றுத்தர நடவடிக்கை எடுக்க வேண்டும் என தெரிவிக்கப்பட்டுள்ளது.

கொல்லைமேடு பகுதியைச் சோ்ந்த பெண் அளித்த மனு: கொல்லைமேடு பகுதியில் வங்கியில் கடன்பெற்று தையல் கடை நடத்தி வருகிறேன். எனது கணவா் பழ வியாபாரம் செய்து வருகிறாா் . எங்களது மகளுக்கு திருமணம் செய்ய வங்கியில் இருந்து 22.5 பவுன் நகையை மீட்டு வீட்டில் பீரோவில் வைத்திருந்தேன். கடந்த 2024 நவ.5-ஆம் தேதி எனது கணவா் வியாபாரம் முடித்துவிட்டு வீட்டுக்கு வந்து பாா்த்தபோது வீட்டிலிருந்த பீரோ உடைக்கப்பட்டு அதிலிருந்து 22.5 பவுன் நகை திருடப்பட்டிருந்தது தெரியவந்தது. இதுகுறித்து, அரியூா் காவல் நிலையத்தில் புகாா் அளித்து இதுவரை எங்களது நகையை மீட்டுத் தரவில்லை.

இதனால், எனது கணவருக்கு உடல்நலம் பாதிக்கப்பட்டு வேலூா் தனியாா் மருத்துவமனை சிகிச்சை பெற்று வந்தாா். அதற்காக மருத்துவச் செலவு ரூ.3 லட்சமானது. எனது மகளும் மன உளைச்சலில் மருத்துவ சிகிச்சையில் உள்ளாா். எனவே, காவல் துறை அதிகாரிகள் எங்களது நகையை மீட்டுத்தர நடவடிக்கை எடுக்க வேண்டும் என தெரிவிக்கப்பட்டுள்ளது.

இதேபோல், பல்வேறு புகாா்கள் தொடா்பாக 30-க்கும் மேற்பட்ட மனுக்கள் பெறப்பட்டன. அவற்றின் மீது விரைவாக தீா்வுகாண வேண்டும் என்று சம்பந்தப்பட்ட காவல்நிலைய போலீஸாருக்கு ஏடிஎஸ்பி பாஸ்கரன் உத்தரவிட்டாா்.