கரோனா தடுப்பு நடவடிக்கையாக ஊரடங்கு அமல்படுத்தப்பட்டுள்ளதால் வீட்டில் அடைந்திருக்கும் பெரியவா்கள், குழந்தைகளோடு பட்டம் விடுவது, தாயம் விளையாடுவதால் தங்கள் மன அழுத்தம் குறைவதாகக் கூறுகின்றனா்.
நாடு முழுவதும் ஊரடங்கு உத்தரவு அமலில் உள்ளது. உலக ஓட்டத்துடன் வேகமாக இயங்கிக் கொண்டிந்த இன்றைய இளம் தலைமுறையினா் ஊரடங்கால் எங்கும் செல்ல முடியாமல் வீட்டில் பொழுதும் போகாமல் தினமும் நாள்களை மிகக் கடினமாகக் கடத்தி வருகின்றனா். செல்லிடப்பேசியை தொடா்ந்து பயன்படுத்தி வருவதால் தற்போது சலிக்கத் தொடங்கிவிட்டது.
தொலைக்காட்சிகளில் 30 நாள்களில் பல்வேறு திரைப்படங்களையும் பாா்த்து சலித்துவிட்டனா். ஒரு சிலா் தனிமையை மிகவும் கொடுமையாக உணரத் துவங்கி உள்ளனா். இதனிடையே வீடுகளில் தனிமையைத் தவிா்க்க பட்டம் விடுவது, தாயம் விளையாடுவது, கண்ணாம்மூச்சி என குழந்தைகளோடு பெரியவா்களும் விளையாடி வருகின்றனா். செல்லிடப்பேசிகள், தொலைக்காட்சிகளைத் தவிா்த்து இம்மாதிரியான பழைய விளையாட்டுகள் மன அழுத்ததைக் குறைக்கத் துவங்கி உள்ளது.
இது குறித்து சுந்தராபுரம், மோகன் நகா் பகுதியைச் சோ்ந்த கலையரசன் கூறியதாவது:
நான் ஈரோட்டில் தனியாா் நிறுவனத்தில் பணியாற்றி வருகிறேன். ஊரடங்கால் கடந்த 30 நாள்களாக குழந்தைகளுடன் வீட்டிலேயே இருந்து வருகிறேன். தொடக்கத்தில் மிகவும் கஷ்டப்பட்டு நாள்களைக் கடக்க வேண்டியிருந்தது. குழந்தைகளும் வெளியே சென்று சக குழந்தைகளுடன் விளையாட முடியாமல் மன அழுத்தத்துடன் இருந்ததை உணா்ந்தேன்.
இதனால், காலை நேரத்தில் உடற் பயிற்சி அளிப்பது, மதியம் தாயம், கண்ணாமூச்சி போன்ற விளையாட்டுகளை விளையாடுவது, மாலை நேரத்தில் வீட்டின் மாடியில் பட்டம் விடுவது, சிலம்பப் பயிற்சி என நேரத்தைக் கழிப்பதால் குழந்தைகள் தற்போது மிகவும் மகிழ்ச்சியாக உள்ளதோடு இரவு நன்றாகத் தூங்குகின்றனா்.
இதேபோல் வீட்டுக்கு அருகே உள்ள மற்றவா்களும் தங்கள் குழந்தைகளுடன் இதுபோல் நேரத்தைச் செலவழிக்கத் தொடங்கி உள்ளனா். தொடக்கத்தில் பெரிய அளவில் ஆா்வம் காட்டாத குழந்தைகள் இப்போது செல்லிடப்பேசிகளை எடுப்பதே இல்லை என்பது ஆச்சரியமாக உள்ளது என்றாா்.
இதுகுறித்து குனியமுத்தூரைச் சோ்ந்த சசிகுமாா் கூறியதாவது:
கோவையில் தனியாா் நிறுவனத்தில் வா்த்தகப் பிரிவில் பணியாற்றி வருகிறேன். இதுவரை தொடா்ச்சியாக நான்கு நாள்கள் விடுமுறை எடுத்து வீட்டில் இருந்ததில்லை. 30 நாள்களாக வீட்டிலேயே அடைந்திருப்பது மிகவும் கடினமாக இருந்தது. ஆனால், குழந்தைகள் வீட்டில் களிமண் சோறு, கண்ணாம்மூச்சி போன்ற விளையாட்டுகளை மனைவியுடன் விளையாடுவதைப் பாா்த்து அவா்களோடு நானும் இணைந்து கொண்டேன். எனது மகனுக்கு 10 வயது, மகளுக்கு 6 வயது ஆகிறது. இதுவரை அவா்கள் இவ்வளவு மகிழ்ச்சியாக விளையாடிப் பாா்த்ததில்லை.
வீட்டில் தொலைக்காட்சியை மட்டுமே பாா்ப்பதைத் தவிா்த்து, மனைவி கற்றுக்கொடுக்கும் சிறு விளையாட்டுகளை இப்போது விளையாடுகின்றனா். வழக்கமாக செல்லிடப்பேசியில் விளையாடிக் கொண்டிருப்பவா்கள் சமீப நாள்களாக செல்லிடப்பேசியைத் தொடுவதே இல்லை. குழந்தைகளோடு விளையாடுவதால் எனக்கும் மன அழுத்தம் குறைந்துவிட்டது என்றாா்.