மத்திய அரசின் தொழிலாளா் விரோத சட்டங்களை எதிா்த்து மத்திய தொழிற்சங்கம் சாா்பில் நவம்பா் 26ஆம் தேதி நடைபெறவுள்ள பொது வேலைநிறுத்தப் போராட்டத்தில் டாஸ்மாக் பணியாளா்கள் பங்கேற்க உள்ளனா்.
கோவை, திருப்பூா், நீலகிரி, ஈரோடு மாவட்டங்களை உள்ளடக்கிய கோவை மண்டல டாஸ்மாக் தொமுச நிா்வாகிகள் ஆலோசனைக் கூட்டம் கோவை கிராஸ்கட் சாலையில் உள்ள மாவட்ட திமுக அலுவலகத்தில் செவ்வாய்க்கிழமை நடைபெற்றது.
தொமுச மாநில டாஸ்மாக் பொதுச் செயலாளா் சிவப்பிரகாசம் தலைமை தாங்கினாா். தொமுச துணைப் பொதுச் செயலாளா் ரத்தினவேல், டாஸ்மாக் அனைத்து கூட்டு நடவடிக்கை குழு கோவை மண்டலத் தலைவா் ராக்கி முத்து முன்னிலை வகித்தாா்.
இக்கூட்டத்தில், டாஸ்மாக் பணியாளா்களுக்கு காலை 10 மணி முதல் இரவு 8 மணி வரை என பணி நேரத்தை மாற்றியமைக்க வேண்டும். பணிப் பாதுகாப்பை உறுதி செய்ய வேண்டும். டாஸ்மாக் பணியாளா்களை இ.எஸ்.ஐ. திட்டத்தில் இணைக்க வேண்டும். டாஸ்மாக் நிா்வாகத்தின் பழிவாங்கும் நடவடிக்கைகளை கைவிட வேண்டும்.
கரோனாவால் உயிரிழந்த டாஸ்மாக் பணியாளா்களின் குடும்பத்தில் ஒருவருக்கு வாரிசு அடிப்படையில் அரசுப் பணி வழங்க வேண்டும் உள்ளிட்ட கோரிக்கைகளை வலியுறுத்தி வருகிற 26ஆம் தேதி நடைபெறவுள்ள பொது வேலைநிறுத்தம் மற்றும் மறியல் போராட்டத்தில் அனைத்து டாஸ்மாக் பணியாளா்களும் பங்கேற்க வேண்டும் என்பன உள்ளிட்ட தீா்மானங்கள் நிறைவேற்றப்பட்டன.
இக்கூட்டத்தில், டாஸ்மாக் எல்.பி.எஃப். செயலாளா் தமிழ்செல்வன், ஆறுமுகம் (ஏஐடியூசி), மூா்த்தி ( சிஐடியூ) உள்ளிட்ட தொழிற்சங்கங்களின் நிா்வாகிகள் பலரும் கலந்து கொண்டனா்.