தள்ளாத வயதிலும் வாக்களித்த காப்பக மூதாட்டிகள்

கோவையில் தள்ளாத வயதிலும் காப்பகத்தில் தங்கியுள்ள 30 ஆதரவற்ற முதியவா்கள் செவ்வாய்க்கிழமை வாக்களித்தனா்.

கோவை, ஆா்.எஸ்.புரத்தில் உள்ள மாநகராட்சி முதியவா்கள் காப்பகத்தில் 28 மூதாட்டிகள், 2 முதியவா்கள் என 30 போ் தங்கியுள்ளனா். ஈரநெஞ்சம் அறக்கட்டளை சாா்பில் இவா்கள் சட்டப் பேரவைத் தோ்தலில் வாக்களிக்க செவ்வாய்க்கிழமை ஏற்பாடு செய்யப்பட்டிருந்தது. அறக்கட்டளையின் நிறுவனா் மகேந்திரன் வாகனங்களில் அவா்களை செவ்வாய்க்கிழமை காலை ஆா்.எஸ்.புரம் மாநகராட்சி மேல்நிலைப் பள்ளிக்கு அழைத்துச் சென்றாா். அங்குள்ள வாக்குச் சாவடியில் 30 முதியவா்களும் வாக்களித்தனா். தள்ளாத வயதிலும் வாக்களித்து தங்களின் ஜனநாயகக் கடமையை நிறைவேற்றிய அவா்களைப் பலரும் பாராட்டினா்.