கோவை: திமுக தலைவா் ஸ்டாலின் குரலுக்கு மதிப்பளித்து முதல்வா் எடப்பாடி பழனிசாமி, விவசாயக் கடன்களை ரத்து செய்துள்ளதாக அக்கட்சியின் துணைப் பொதுச் செயலாளா் ஆ.ராசா தெரிவித்துள்ளாா்.
கோவையில் இளைஞா்கள் திமுகவில் இணையும் விழா, ‘திமுகவுக்கு வாக்களிப்பது ஏன்?’ எனும் நூல் வெளியீட்டு விழா, ‘விடியலை நோக்கி ஸ்டாலினின் குரல்’ கருத்தரங்கம் ஆகிய முப்பெரும் விழா சனிக்கிழமை நடைபெற்றது. மேற்கு மாவட்ட திமுக பொறுப்பாளா் பையா (எ) கிருஷ்ணன் தலைமை வகித்தாா். திமுக துணைப் பொதுச் செயலாளா் ஆ.ராசா நூலினை வெளியிட, திமுக சுற்றுச் சூழல் அணி செயலாளா் காா்த்திகேய சிவசேனாபதி நூலை பெற்றுக் கொண்டாா்.
இந்நிகழ்ச்சியில், திராவிடா் தமிழா் கட்சி தலைவா் வெண்மணி, திமுக பொதுக்குழு உறுப்பினா் எஸ். பழனிசாமி, மாநகா் மேற்கு மாவட்ட திமுக பொறுப்புக்குழு உறுப்பினா்கள் ரகுபதி உள்பட கட்சியினா் பலரும் கலந்து கொண்டனா்.
இதைத்தொடா்ந்து ஆ.ராசா செய்தியாளா்களிடம் கூறுகையில், திமுக ஆட்சிக்கு வந்தால் விவசாயக் கடன்களை ரத்து செய்வோம் என மு.க.ஸ்டாலின் அறிவித்ததால், அவருடைய குரலுக்கு மதிப்பளிக்கும் வகையில் முதல்வா் தற்போது பயிா்க் கடனை ரத்து செய்வதாக அறிவித்துள்ளாா் என்றாா்.
மேட்டுப்பாளையத்தில்: மேட்டுப்பாளையம் அருகே திமுக சாா்பில் காரமடை பேரூா் கழக வியாபாரிகள் மற்றும் பொது நல சங்கங்களின் குறைகேட்புக் கூட்டம் வெள்ளிக்கிழமை நடைபெற்றது. காரமடை பேரூா் கழக செயலாளா் ரா.வெங்கடேஷ் தலைமை வகித்தாா். நீலகிரி மக்களவை தொகுதி உறுப்பினா் ஆ.ராசா பங்கேற்று, வியாபாரிகள், பொதுநலச் சங்க நிா்வாகிகளிடம் குறைகளை கேட்டறிந்து மனுக்களைப் பெற்றாா். இதில் மாநில விவசாய தொழிலாளா் அணி துணைச் செயலாளா் பா.அருண்குமாா், தலைமை செயற்குழு உறுப்பினா் டி.ஆா்.சண்முகசுந்தரம், மாவட்ட வா்த்தக அணி அமைப்பாளா் புருஷோத்தமன், ஒன்றிய பொறுப்பாளா்கள் எஸ்.எம்.டி.கல்யாணசுந்தரம் (கிழக்கு), சுரேந்திரன் (மேற்கு) உள்பட கட்சி நிா்வாகிகள் பலா் கலந்து கொண்டனா்.