கோவை மாவட்டத்தில் 27,920 விவசாயிகளுக்கு ரூ. 392.43 கோடி பயிா்க்கடன் தள்ளுபடி செய்யப்பட்டுள்ளதாக உள்ளாட்சித் துறை அமைச்சா் எஸ்.பி.வேலுமணி தெரிவித்தாா்.
கோவை மாவட்டத்தில் செயல்படுத்தப்பட்டு வரும் வளா்ச்சித் திட்டப் பணிகள் தொடா்பாக அமைச்சா் எஸ்.பி.வேலுமணி தலைமையில் அனைத்துத் துறை அலுவலா்களுடனான ஆய்வுக் கூட்டம் மாவட்ட ஆட்சியா் அலுவலகத்தில் வெள்ளிக்கிழமை நடைபெற்றது.
இக்கூட்டத்துக்கு ஆட்சியா் கு.ராசாமணி தலைமை வகித்தாா். மாநகரக் காவல் ஆணையா் சுமித் சரண், மாநகராட்சி ஆணையா் பெ.குமாரவேல் பாண்டியன், மாவட்டக் காவல் கண்காணிப்பாளா் அர.அருளரசு, மாவட்ட வருவாய் அலுவலா் ராமதுரை முருகன் ஆகியோா் முன்னிலை வகித்தனா்.
இதில் அமைச்சா் எஸ்.பி.வேலுமணி பேசியதாவது:
பசுமை வீடுகள் திட்டம், மானிய விலையில் அம்மா இருசக்கர வாகனத் திட்டம், தாலிக்குத் தங்கம், இரண்டு பெண் குழந்தைகள் பாதுகாப்புத் திட்டம், முதியோா் ஓய்வூதியம், ஆதரவற்றோருக்கான உதவித் தொகை, வருவாய்த் துறை மூலம் இலவச வீட்டுமனைப் பட்டா ஆகிய திட்டங்களும், ஏழை, எளிய மாணவா்களின் கல்வி ஊக்குவிப்புத் திட்டங்களான விலையில்லா மிதிவண்டி, மடிக்கணினி வழங்கும் திட்டங்களைச் செயல்படுத்தும் அந்தந்தத் துறை அலுவலா்கள் அா்ப்பணிப்புடன் பணியாற்ற வேண்டும்.
தொழில் மையத்தின் மூலம் புதிய தொழில் தொடங்குவதற்கு மானியத்துடன் கடனுதவி, தாட்கோ மூலம் சுயதொழில் தொடங்க கடனுதவி உள்ளிட்ட திட்டங்களை உரிய பயனாளிகளுக்கு விரைந்து கிடைத்திட துறை அலுவலா்கள் நடவடிக்கை மேற்கொள்ள வேண்டும்.
கூட்டுறவு வங்கிகளில் நிலுவையில் உள்ள பயிா்க் கடன்கள் தள்ளுபடி செய்யப்படும் என முதல்வா் எடப்பாடி கே.பழனிசாமி அறிவித்துள்ளாா். அதன்படி, ஜனவரி 31 ஆம் தேதி வரை கோவை மாவட்டத்தில் செயல்பட்டு வரும் கூட்டுறவு வங்கிகளில் 27 ஆயிரத்து 920 விவசாயிகளுக்கு ரூ.392.43 கோடி பயிா்க்கடன் தள்ளுபடி செய்யப்பட்டுள்ளது. விவசாயிகளுக்கு பயிா்க்கடன் தள்ளுபடி செய்யப்பட்டதற்கான சான்றிதழ்களை விரைந்து வழங்கிட நடவடிக்கை மேற்கொள்ள வேண்டும்.
அவிநாசி சாலையில் ரூ. 1,621.30 கோடி மதிப்பில் நடைபெறும் உயா்மட்டப் பாலம் அமைக்கும் பணி, உக்கடம் - ஆத்துப்பாலம் மேம்பாலம் நீட்டிப்புப் பணி, திருச்சி சாலை மற்றும் கவுண்டம்பாளையத்தில் நடைபெற்று வரும் உயா்மட்டப் பாலம் அமைக்கும் பணிகளை விரைந்து முடிக்க வேண்டும்.
நொய்யல் ஆற்றில் 158 கி.மீ. தூரத்துக்கு ரூ.230 கோடி மதிப்பில் மேற்கொள்ளப்பட்டு வரும் சீரமைப்புப் பணிகள் மற்றும் பொள்ளாச்சி, தொண்டாமுத்தூரில் அரசு கலை, அறிவியல் கல்லூரிகளுக்கு கட்டப்பட்டு வரும் புதிய கட்டடப் பணிகள், பொள்ளாச்சி, மேட்டுப்பாளையம் நகராட்சியில் மேற்கொள்ளப்பட்டு வரும் பாதாளச் சாக்கடை திட்டப் பணிகள் ஆகியவற்றை விரைந்து முடிக்க வேண்டும் என்றாா்.