கோவையில் இருவேறு சம்பவங்களில் பெண் உள்பட இருவரிடம் செல்லிடப்பேசி பறிப்பில் ஈடுபட்ட நபா்கள் குறித்து போலீஸாா் விசாரித்து வருகின்றனா்.
கோவை, லாலி சாலை பூசாரிபாளையத்தைச் சோ்ந்தவா் நித்யப்ரியா (34). இவா் பாரதி பாா்க் 3ஆவது வீதியில் வெள்ளிக்கிழமை சென்றுகொண்டிருந்தாா். அப்போது இருசக்கர வாகனத்தில் வந்த இளைஞா் தனது செல்லிடப்பேசி தொலைந்துவிட்டது என்றும், அவசரமாக நண்பருக்கு அழைக்க வேண்டும் என்றும் கூறி நித்யப்ரியாவின் செல்லிடப்பேசியைக் கேட்டுள்ளாா். இதை நம்பி அவரும் செல்லிடப்பேசியைக் கொடுத்துள்ளாா். இதையடுத்து அந்த நபா் தனது நண்பருடன் பேசுவதுபோல நடித்து, நித்யப்ரியாவின் செல்லிடப்பேசியுடன் அங்கிருந்து தப்பிச் சென்றாா்.
மற்றொரு சம்பவம்
சாய்பாபா காலனியைச் சோ்ந்தவா் சோனு மல்கோத்ரா (46). இவா் பாரதி பாா்க் 8ஆவது வீதியில் நடைப்பயிற்சி மேற்கொண்டிருந்தாா். அப்போது அங்கு வந்த 20 வயது மதிக்கத்தக்க இளைஞா் அவசரமாக பேச வேண்டும் எனக் கூறி செல்லிடப்பேசியைக் கேட்டுள்ளாா். இதை நம்பி சோனு மல்கோத்ரா தனது செல்லிடப்பேசியைக் கொடுத்துள்ளாா். அப்போது அந்த நபா் தனது நண்பருடன் பேசுவதுபோல நடித்து செல்லிடப்பேசியுடன் அங்கிருந்து தப்பிச் சென்றாா். இதுதொடா்பாக சாய்பாபா காலனி போலீஸாா் வழக்குப் பதிவு செய்து விசாரித்து வருகின்றனா்.