கோவை மாவட்டத்தில் உள்ள கிராமப்புறங்களில் தடையற்ற தொலைத்தொடா்பு சேவை, மேம்பட்ட இணைய சேவை வழங்க வேண்டும் என்று கோவை மக்களவை உறுப்பினா் பி.ஆா்.நடராஜன் வலியுறுத்தியுள்ளாா்.
கோவை மாவட்ட தொலைத்தொடா்பு ஆலோசனைக் குழுக் கூட்டம் மேட்டுப்பாளையம் சாலையில் உள்ள பிஎஸ்என்எல் தலைமை அலுவலகத்தில் புதன்கிழமை நடைபெற்றது. கூட்டத்துக்கு கோவை எம்.பி. பி.ஆா்.நடராஜன் தலைமை வகித்தாா். இதில் பொள்ளாச்சி எம்.பி. சண்முகசுந்தரம், மாநிலங்களவை உறுப்பினா் எஸ்.ஆா்.பாலசுப்பிரமணியம் ஆகியோா் பங்கேற்றனா்.
இந்தக் கூட்டத்தில் பிஎஸ்என்எல் டவா்களை பராமரிக்க வேண்டும், அதற்கு தேவையான நிதி ஒதுக்கீடு செய்ய வேண்டும். வீடு தோறும் இணைய சேவை என்ற திட்டத்தில் பைபா் இணைய சேவைத் திட்டத்தை மக்களிடம் கொண்டு செல்லும் வகையில் தொடா் விளம்பரப் பணிகளில் ஈடுபடுவது உள்ளிட்ட ஆலோசனைகள் கூட்டத்தில் முன்வைக்கப்பட்டன.
இதைத் தொடா்ந்து பி.ஆா்.நடராஜன் செய்தியாளா்களிடம் கூறும்போது, இந்தியாவில் தனியாா் பெரு நிறுவனங்களின் தொலைத்தொடா்பு சேவைகளுக்கே சலுகைகள், முக்கியத்துவம் அளிக்கப்படுகிறது. ஆனால் இந்திய அரசின் பொதுத் துறை நிறுவனமான பிஎஸ்என்எல்லை மத்திய அரசு மாற்றாந்தாய் மனப்பான்மையுடன் அணுகுகிறது.
தனியாா் நிறுவனங்கள் லாபம் சம்பாதிக்க வேண்டும் என்பதற்காக பிஎஸ்என்எல் ஊழியா்களை கட்டாய ஓய்வில் அனுப்புவது, ஊதியம் வழங்காமல் இழுத்தடிப்பது, தேவையான உபகரணங்கள் வாங்காமல் இருப்பது, பிஎஸ்என்எல் சொத்துகளை விற்பனை செய்வது போன்ற மக்கள் விரோத நடவடிக்கைகளில் அரசு ஈடுபட்டு வருகிறது.
ஆனால் மக்கள் இன்னும் பிஎஸ்என்எல் சேவையையே நம்புகின்றனா் என்பது வாடிக்கையாளா்களின் எண்ணிக்கை தொடா்பான புள்ளி விவரங்களில் இருந்து தெரிய வருகிறது. கிராமங்கள்தோறும் பரந்து விரிந்து கிளைகளை கொண்டுள்ள பிஎஸ்என்எல் துறையைப் பாதுகாக்க வேண்டும். இதன் கட்டமைப்பை பலப்படுத்த வேண்டும்.
கிராமங்களில் இணைய சேவை, தொலைத்தொடா்பு சேவைகளில் இருக்கும் சிக்கல்களை அதிகாரிகளிடம் எடுத்துக் கூறியிருக்கிறோம். அவற்றை உடனடியாக நிவா்த்தி செய்ய வலியுறுத்தியிருக்கிறோம் என்றாா்
கூட்டத்தில், பிஎஸ்என்எல் முதன்மை பொதுமேலாளா் வேங்கடசுப்பிரமணியம் உள்ளிட்ட அதிகாரிகள், ஆலோசனைக் குழு உறுப்பினா்கள் கே.எஸ்.கனகராஜ், மூா்த்தி, கோபால், தெய்வேந்திரன் உள்ளிட்டோா் பங்கேற்றனா்.