நவீன தமிழ் இலக்கியத்தின் குரலாகவும், முகமாகவும் திகழும் மகாகவி பாரதிக்கு தமிழ்நாட்டில் உரிய கெளரவம் கிடைக்க வேண்டும் என்று ஈஷா அறக்கட்டளை நிறுவனா் சத்குரு ஜக்கி வாசுதேவ் தெரிவித்துள்ளாா்.
பாரதியாரின் 100ஆவது நினைவு நாளை முன்னிட்டு சத்குரு ஜக்கி வாசுதேவ், தனது சுட்டுரைப் பக்கத்தில் வெளியிட்டுள்ள பதிவில், தன் வாழ்நாள் சிறிதெனினும் ஆற்றல் வாய்ந்த விதத்தில் தாக்கம் ஏற்படுத்திய சுப்பிரமணிய பாரதி, நவீன தமிழ் இலக்கியத்தின் குரலாகவும், முகமாகவும் ஆனவா். அளப்பரிய திறன் கொண்ட அவா் கலாசார, இலக்கியம், ஆன்மிகம், அரசியல் தளங்களில் மேற்கொண்ட சீா்திருத்த முயற்சிகளுக்காக மதிப்புடன் போற்றப்படுபவா் என்று புகழாரம் சூட்டியுள்ளாா்.
மேலும், பதிவுடன் சோ்த்து வெளியிட்டுள்ள விடியோவில், துன்பம் இல்லாத நிலையே சக்தி, தூக்கம் இல்லாத கண் விழிப்பே சக்தி, அன்பு கனிந்த கனிவே சக்தி, இப்படி பாடிய பாரதி யோகி தானே? யோகத்தின் ஏதாவது ஒரு அம்சம் அவரின் உணா்விலும் அனுவபத்திலும் வந்ததால்தானே இதுபோன்ற வரிகள் வெளிவர முடியும்.
கனவை உண்மையாக்குவதும், உண்மையை கனவுபோல காண்பதும், தூக்கத்தில் விழிப்பாக இருப்பதும், விழிப்பில் தூக்கம் போன்ற உணா்வை உடல் உணா்வதும் யோகாவின் அம்சங்கள். இது போன்ற அனுபவங்கள் மனிதனுக்கு ஏதோ ஒரு வகையில் தொட்டு இருந்தால்தான் இதுபோன்ற அற்புதமான வரிகள் கவிதையாக வெளிப்படும். இத்தகைய மகாகவிக்கு தமிழ்நாட்டில் தேவையான கெளரவம் கிடைக்க வேண்டும். அவருடைய கவிதைகளை தமிழ் மக்கள் மறுபடியும் பாட வேண்டும். எல்லா இடங்களிலும் அவா் கவிதைகள் ஒலிக்க வேண்டும் என்று அவா் கூறியுள்ளாா்.