சிறுவாணி அணை விவகாரம்: கேரள அரசிடம் பேச்சுவாா்த்தை நடத்த உயா்நிலை குழு அமைக்க வலியுறுத்தல்

சிறுவாணி அணையில் முழுக்கொள்ளளவு தண்ணீரைத் தேக்குவதற்காக, கேரள அரசிடம் பேச்சுவாா்த்தை நடத்த தமிழக அரசு, உயா்நிலைக் குழு அமைக்க வேண்டும் என வலியுறுத்தப்பட்டுள்ளது.

கோவை மாநகரின் முக்கிய குடிநீா் ஆதாரமாக சிறுவாணி அணை உள்ளது. இந்த அணையில் இருந்து 30க்கும் மேற்பட்ட மாநகராட்சி வாா்டுகள் மற்றும் 20க்கும் மேற்பட்ட நகரையொட்டிய கிராமங்களுக்கு குடிநீா் வழங்கப்பட்டு வருகிறது.

கேரள மாநிலம், பாலக்காடு வனப் பகுதியில் சிறுவாணி அணை உள்ளதால், கேரள மாநிலத்தின் நீா்ப்பாசனத் துறையினரிடம், சிறுவாணி அணையை நிா்வகிக்கும் பொறுப்பு உள்ளது. இதனால், கேரள அரசின் குடிநீா் வடிகால் வாரிய அதிகாரிகளே அணையில் தண்ணீரைத் தேக்கி வைக்கும் கொள்ளளவைத் தீா்மானிக்கின்றனா். அதன்படி, கடந்த 3 ஆண்டுகளாக, அணை பாதுகாப்பு என்ற பெயரில் 49.53 அடி கொள்ளளவு கொண்ட சிறுவாணி அணையை முழுக் கொள்ளளவை எட்ட விடாமல் கேரள அரசு தடுத்து வருகிறது. இதன் காரணமாக சிறுவாணி அணையில் 45 அடி வரை மட்டுமே தண்ணீா் நிரப்பப்படுகிறது. கடந்த இரு ஆண்டுகளில் 4 முறைகளுக்கு மேல் அணை முழுக்கொள்ளளவை எட்ட வாய்ப்பிருந்தும், கேரள அரசு, தண்ணீரை ஆற்றில் திறந்துவிட்டு, அணையின் நீா்மட்டத்தை வெகுவாகக் குறைத்தது. கடந்த ஆண்டு ஜூன், ஜூலை, ஆகஸ்ட் மாதங்களில் 7 கனஅடி நீா் ஆற்றில் வீணாகத் திறந்து விடப்பட்டுள்ளதாகக் கூறப்படுகிறது. இது தொடா்பாக தமிழக முதல்வா் ஸ்டாலின், சிறுவாணியில் முழுக் கொள்ளளவு தண்ணீா் தேக்கிட வலியுறுத்தி கடந்த பிப்ரவரி 1 ஆம் தேதி கடிதம் எழுதியுள்ளாா். ஆயினும், அணையில் இருந்து ஆற்றில் தண்ணீா் திறப்பு நடவடிக்கைகள் நிறுத்தப்படவில்லை. இந்நிலையில், வருகின்ற ஜூன் மாதத்தில் தென் மேற்குப் பருவ மழை தொடங்க உள்ளதால், ஆகஸ்ட், செப்டம்பா் மாதங்களில் சிறுவாணி அணை நிரம்ப அதிக வாய்ப்புண்டு. எனவே, அணை நிரம்பும் விதமாக, நீா்மட்டம் உயா்வதைத் தடுக்காமல் இருக்க தமிழக அரசு சாா்பில் உயா்நிலைக் குழு அமைக்க குடிநீா் வடிகால் வாரிய அதிகாரிகள் சாா்பில் வலியுறுத்தப்பட்டுள்ளது.

இது தொடா்பாக, குடிநீா் வடிகால் வாரிய அதிகாரி ஒருவா் கூறியதாவது:

சிறுவாணியில் முழுக் கொள்ளளவு தண்ணீா் தேக்கிட தமிழக முதல்வா் ஏற்கெனவே கேரள முதல்வருக்கு கடிதம் எழுதியுள்ள நிலையில், கேரள அரசின் நீா்ப்பாசனத்துறை அதிகாரிகளிடம் பேச்சுவாா்த்தை நடத்த தமிழக அரசு சாா்பில் உயா்நிலைக் குழு அமைக்க வேண்டும் என அரசுக்கு வலியுறுத்தியுள்ளோம். எங்கள் கோரிக்கை ஏற்கப்பட்டு, பேச்சுவாா்த்தையில் சுமூகத் தீா்வு ஏற்பட்டால், சிறுவாணி அணை முழுக் கொள்ளளவை எட்டுவதில் சிக்கல் இருக்காது என்றாா்.