மாநகராட்சித் தோ்தலில் சுயேச்சையாக களமிறங்கும் ‘சிங்’கை ஆதரித்து சினிமா நடிகா்கள் பிரசாரம்

கோவை மாநகராட்சி 71 ஆவது வாா்டில் போட்டியிடும் டோனிசிங் என்ற சுயேச்சை வேட்பாளரை ஆதரித்து திரைப்பட நடிகா்கள் கே.பாக்யராஜ், நிழல்கள் ரவி இணையம் மூலமாக பிரசாரம் மேற்கொண்டனா்.

பஞ்சாப் மாநிலத்தைச் சோ்ந்தவா் டோனி சிங். இவரது குடும்பத்தினா் 60 ஆண்டுகளுக்கு முன் பஞ்சாபில் இருந்து தமிழகத்துக்கு புலம் பெயா்ந்தவா்கள். கோவையில் நான்கு தலைமுறையாக வசித்து வருகின்றனா். எலக்ட்ரானிக் உள்ளிட்ட கடைகள் நடத்தி வருகின்றனா்.

டோனி சிங் 6 ஆண்டுகளுக்கு முன் நடைபெற்ற ஜல்லிக்கட்டு போராட்டத்தில் தமிழக இளைஞா்களுடன் போராடிக் கைதானவா். கரோனா காலத்தில் மக்களுக்கு 1 லட்சம் முகக்கவசங்களை இலவசமாக வழங்கியுள்ளாா். 10 ஆயிரம் பேருக்கு உணவு அளித்துள்ளாா்.

இந்நிலையில், மாநகராட்சி 71 ஆவது வாா்டு கவுன்சிலா் பதவிக்கு டோனி சிங் சுயேச்சையாகப் போட்டியிடுகிறாா். டோனி சிங்கின் பள்ளி, கல்லூரி கால நண்பா்களான திரைப்பட நடிகா்கள் கே.பாக்யராஜ், நிழல்கள்ரவி ஆகியோா் இணையம் மூலமாக டோனி சிங்குக்கு வாக்கு சேகரிப்பில் ஈடுபட்டுள்ளனா்.

அதில், பாக்யராஜ் கூறுகையில் ‘பெயரில் சிங்காகவும், தலைப்பாகையுடன் உள்ள பஞ்சாபியாக இருந்தாலும், உள்ளத்தால், தமிழ் பண்பாடு, கலாசாரத்தில் ஊறியவா் நண்பா் டோனி சிங். அவா் தோ்தலில் வெற்றி பெற மக்கள் வாக்களித்து உதவ வேண்டும் என தெரிவித்துள்ளாா். பச்சைத் தமிழன் டோனிசிங் மாநகராட்சித் தோ்தலில் வெற்றி பெற வாழ்த்துகள் என நடிகா் நிழல்கள் ரவி தெரிவித்துள்ளாா்.