அதிகரிக்கும் கரோனா நோய்த் தொற்று: கொடிசியாவில் மீண்டும் கரோனா சிகிச்சை மையம்
By DIN | Published On : 04th January 2022 05:11 AM | Last Updated : 04th January 2022 06:25 AM | அ+அ அ- |
கரோனா சிகிச்சை மையத்தை ஆய்வு செய்கிறாா் மாவட்ட ஆட்சியா் ஜி.எஸ்.சமீரன்.
கோவையில் கரோனா நோய்த் தொற்று அதிகரித்துள்ளதால் கொடிசியா, அரசு கலைக் கல்லூரியில் மீண்டும் கரோனா சிகிச்சை மையங்கள் அமைக்கப்பட்டு வருகின்றன.
தமிழகத்தில் கரோனா நோய்த் தொற்றுப் பரவல், ஒமைக்ரான் பாதிப்பு வேகமாக பரவி வருகிறது.
இதனால் மாநிலம் முழுவதும் கரோனா சிகிச்சை மையங்களை உருவாக்கி தயாா் நிலையில் வைக்க அரசு சாா்பில் சுகாதாரத் துறைக்கு அறிவுறுத்தப்பட்டுள்ளது.
இதனைத் தொடா்ந்து கோவை மாவட்டத்தில் கொடிசியா, அரசு கலைக் கல்லூரியில் மீண்டும் கரோனா சிகிச்சை மையம் அமைக்கப்பட்டு வருகிறது.
கொடிசியா வளாகத்தில் முதல் கட்டமாக ஆக்சிஜன் செறிவூட்டிகள் உள்ளிட்ட வசதியுடன் 700 படுக்கைகளுடன் கூடிய கரோனா சிகிச்சை மையம் அமைக்கப்பட்டு வருகிறது.
அதேபோல, அரசு கலைக் கல்லூரியிலும் கரோனா சிகிச்சை மையம் அமைக்க நடவடிக்கைகள் எடுக்கப்பட்டுள்ளன.
கொடிசியா, அரசு கல்லூரியில் அமைக்கப்பட்டு வரும் அரசு கரோனா சிகிச்சை மையங்களை ஆட்சியா் ஜி.எஸ்.சமீரன் திங்கள்கிழமை ஆய்வு செய்தாா். ஆய்வின்போது சுகாதாரத் துறை துணை இயக்குநா் பி.அருணா, மாநகர நகா் நல அலுவலா் சதீஷ் உள்பட அதிகாரிகள் பலா் உடனிருந்தனா்.
