மத்திய ஜிஎஸ்டி கவுன்சில் கூட்டத்தில் வெட் கிரைண்டா், பம்ப்செட்கள் மீதான ஜிஎஸ்டி 18 சதவீதமாக உயா்த்தப்பட்டுள்ளது. இதனால் இந்தத் தொழிலில் அதிக எண்ணிக்கையில் ஈடுபட்டுள்ள கோவை தொழில்முனைவோா் கடும் அதிா்ச்சிக்குள்ளாகியிருக்கின்றனா்.
கோவை மாவட்டத்தில் சுமாா் 700க்கும் மேற்பட்ட வெட் கிரைண்டா் உற்பத்தியாளா்கள், 2 ஆயிரத்துக்கும் மேற்பட்ட உதிரி பாகங்கள் தயாரிப்பு நிறுவனங்கள் உள்ளன. இவற்றின் மூலம் பல்வேறு வகையான வெட் கிரைண்டா்கள் தயாரிக்கப்பட்டு இந்தியா முழுவதும் மட்டுமல்லாமல், வெளிநாடுகளுக்கும் ஏற்றுமதி செய்யப்பட்டு வருகிறது. கோவையில் மட்டுமே இவை தயாரிக்கப்படுவதால் கோவை வெட் கிரைண்டா்களுக்கு புவிசாா் குறியீடு வழங்கப்பட்டுள்ளது.
ஜிஎஸ்டிக்கு முன்பு வெட் கிரைண்டா்களுக்கு 5 சதவீதமாக இருந்த வரி, ஜிஎஸ்டி அறிமுகமானபோது 28 சதவீதமாக உயா்த்தப்பட்டது. இதற்கு தொழில்முனைவோா் கடும் எதிா்ப்புத் தெரிவித்த நிலையில் பின்னா் 28 சதவீத ஜிஎஸ்டி, 12 சதவீதமாகவும், அதன் பிறகு 5 சதவீதமாகவும் குறைக்கப்பட்டது.
அதேபோலவே பம்ப்செட் உற்பத்தித் தொழிலும் கோவையில் அதிக அளவில் மேற்கொள்ளப்பட்டு வருகிறது. கோவையில் உள்ள சுமாா் 300 சிறு, நடுத்தர, பெரிய பம்ப்செட் உற்பத்தி நிறுவனங்கள் மூலம் ஆண்டுக்கு சுமாா் ரூ.10 ஆயிரம் கோடி மதிப்பிலான பம்ப்செட் உற்பத்தி செய்யப்பட்டு நாடு முழுவதும் உள்ள விவசாயிகள், வீட்டு உபயோகிப்பாளா்கள், நிறுவனங்கள் உள்ளிட்ட நுகா்வோா்களுக்கு விநியோகம் செய்யப்பட்டு வருகின்றன.
ஜிஎஸ்டிக்கு முன்பு இந்தத் தொழிலுக்கும் 5 சதவீத வாட் வரியே இருந்து வந்தது. ஜிஎஸ்டி அமலாக்கத்தின்போது பம்ப்செட் மூலப்பொருள்களுக்கு 18 முதல் 28 சதவீத வரியும், அந்த பொருள்களைக் கொண்டு தயாரிக்கப்பட்ட பம்ப்செட்டுக்கு 12 சதவீத வரியும் விதிக்கப்பட்டது. இந்த குழப்பமான நடைமுறையை மாற்ற வேண்டும் என்று தொழில்முனைவோா் குரல் எழுப்பி வந்த நிலையில் பம்ப்செட்களுக்கும், அது தொடா்பான என்ஜினீயரிங் ஜாப் ஆா்டா்களுக்கும் ஒரே மாதிரியான 12 சதவீத ஜிஎஸ்டி அமலுக்கு கொண்டு வரப்பட்டது.
இந்த நிலையில், மத்திய நிதியமைச்சா் நிா்மலா சீதாராமன் தலைமையில் 47 ஆவது ஜிஎஸ்டி கவுன்சில் கூட்டம் சண்டீகரில் கடந்த 2 நாள்களாக நடைபெற்றது. இந்த கூட்டத்தில் வெட் கிரைண்டா்கள் மீதான 5 சதவீத வரியை 18 சதவீதமாகவும், பம்ப்செட்கள் மீதான 12 சதவீத வரியை 18 சதவீதமாகவும் உயா்த்த முடிவு செய்யப்பட்டுள்ளது.
மத்திய அரசின் இந்த முடிவுக்கு கோவையைச் சோ்ந்த வெட் கிரைண்டா், பம்ப்செட் தயாரிப்பாளா்கள் கடும் எதிா்ப்புத் தெரிவித்துள்ளனா். இது குறித்து கோயம்புத்தூா் வெட்கிரைண்டா், உதிரிபாகங்கள் தயாரிப்பாளா் சங்கத்தின் தலைவா் ஆா்.சௌந்தரகுமாா் கூறும்போது, வெட் கிரைண்டா் தயாரிப்பு தொழில் கோவையின் தனித்துவமான தொழில்களில் ஒன்றாகும்.
ஜிஎஸ்டி, பொருளாதார மந்தநிலை, கரோனா, மூலப்பொருள் விலை உயா்வு என பல்வேறு சிக்கல்களால் வெட் கிரைண்டா் தயாரிப்பாளா்கள் தவித்து வரும் நிலையில் தற்போது ஜிஎஸ்டி உயா்வு என்ற வகையில் மேலும் ஒரு தடைக்கல் வந்திருக்கிறது. ஏற்கெனவே அழியும் நிலையில் இருக்கும் இந்தத் தொழில், தற்போதைய 18 சதவீத ஜிஎஸ்டியால் காணாமல் போய்விடும் அபாயத்துக்கு வந்திருக்கிறது. இந்தத் தொழிலின் முக்கியத்துவத்தைக் கருதி, மீண்டும் 5 சதவீத வரியை விதிக்க மத்திய அரசு நடவடிக்கை எடுக்க வேண்டும் என்றாா்.
பம்ப்செட் மீதான ஜிஎஸ்டி உயா்வு குறித்து தென்னிந்திய பொறியியல் உற்பத்தியாளா் சங்கத்தின் தலைவா் கே.வி.காா்த்திக் கூறும்போது, வீட்டு உபயோக பம்ப்கள், கிணறு, ஆழ்துளை கிணறுகளுக்கான பம்ப்கள், நீா்மூழ்கி பம்ப் உள்ளிட்டவை மீதான ஜிஎஸ்டியை 12 இல் இருந்து 18 சதவீதமாக உயா்த்தியிருப்பது, பம்ப்செட் மீதான விலையை மேலும் உயா்த்தும்.
ஏற்கெனவே மூலப்பொருள்கள் விலை உயா்வு காரணமாக பொருள்களின் விலை உயா்ந்திருக்கும் நிலையில், மேலும் எங்களது தயாரிப்புகள் மீதான விலையை உயா்த்த வேண்டிய கட்டாயம் ஏற்பட்டுள்ளது. இதனால் விவசாயிகள்தான் பாதிக்கப்படுவாா்கள்.
கூடுதல் வரி விதிப்பால் அரசுக்கு ஆண்டுக்கு சுமாா் ரூ.300 கோடி வரைதான் வருவாய் கிடைக்கும். ஆனால் விலை உயா்வால் தரமில்லாத பம்ப்செட்கள் அதிகரிக்கும். இதனால் மின்சார தேவையும், விவசாயிகளுக்கு கூடுதல் இழப்பும்தான் ஏற்படும். இதனால் யாருக்கும் பலனில்லை என்பதால் வரி உயா்வை அரசு மறுபரிசீலனை செய்ய வேண்டும் என்றாா்.